Komisioni Europian ka propozuar një skemë pune me turne të shkurtuara e bazuar kjo te modeli gjerman i programit “Kurzerbait”. Falë kësaj skeme të re, të quajtur “SURE”, BE-ja shpreson që të mund të ndihmojë njerëzit të mbajnë punët e tyre gjatë kësaj kohe që pandemia e koronavirusit ka goditur rëndë ekonominë e 27 vendeve të bllokut europian.
Kjo skemë financimi do të kapë vlerën prej 100 miliardë dollarësh e do t’u jepet përmes huasë vendeve si Italia, Spanja e gjithë vendeve të tjera që janë goditur rëndë nga koronavirusi. Kjo shumë do të financohet nga tregjet e hapura (open markets) e kështu komisioni europian shpreson të zbusë pakëz tensionet aktuale midis vendeve anëtare të BE-së mbi koronabondet (të cilat janë instrumenta të borxhit të përbashkët e që kanë mbështetjen e nëntë prej vendeve të eurozonës si Franca, Italia e Spanja por kundërshtohen fuqishëm nga Gjermania e Hollanda).
Nën planin e ri të Komisionit Europian, qeveritë e ndryshme për këtë shumë të marrë hua nga Brukseli duhet të japin garanci se do t’a mbështesin. E në draftin e propozuar thuhet se vendet e BE-së duhet të vejnë një shumë në formë garancie për këtë hua e cila kolektivisht do të jetë 25 miliardë dollarë. Sasia e shumës së kontribuar nga secili vend do të jetë ne proporcion me ekonomine e tij.
Komisioni Europian, së bashku me institucionet e tjera të BE-së si Banka e Investimeve Europiane dhe ESM-së (Europian Stability Mechanism,) ka fuqinë ta marrë hua nga tregjet e hapura për sa kohë ka mbështetjen e vendeve anëtare të BE-së.
Komisioni shpreson shumë që ky propozim do të pëlqehet nga ministrat e financave të vendeve anëtare.
Presidentja e komisionit europian Ursula von der Leyen e ka bërë këtë anoncim përciptazi përmes një video mesazhi në Twitter. Në videomesazh, znj. Von der Leyen shprehet “Kompanitë po u paguajnë rrogat punonjësve, ndonëse ato nuk po realizojnë të ardhura. Tani Europa do t’u vijë në ndihmë atyre me një iniciativë të re.”
Sipas skemës “Kurzerbait”, që prej kohësh është implementuar në Gjermani, qeveria paguan një pjesë të rrogave të punonjësve kur kompania është e detyruar të shkurtojë oraret si pasojë e një goditjeje ekonomike me të cilën ajo përballet.
Presidentja shprehet se këtë javë komisioni do të tregojë më shumë të dhëna mbi instrumentat që do të përdoren për të mbështetur këtë formë punësimi me orare të shkurtuara./Reuters, Financial Times
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.