Pfizer: Në nëntor kërkojmë autorizimin për vaksinën anti-Covid

Kompania amerikane Pfizer synon që në gjysmën e dytë të nëntorit të marrë autorizimin për hedhjen në treg për vaksinim të gjerë të produktit të saj kundër Covid-19.

“Që ta qartësojmë, duke shpresuar se gjithçka do të ecë sipas parashikimeve tona, Pfizer do të aplikojë për autorizimin emergjent të përdorimit në Shtetet e Bashkuara të Amerikës, menjëherë sapo të jenë siguruar provat e mjaftueshme të sigurisë së vaksinës në javën e tretë të nëntorit”, deklaroi drejtori ekzekutiv i Pfizer, Albert Bourla në një deklaratë publike.

Pfizer thotë se të gjitha të dhënat e siguruara nga testime, të deritanishme dhe ato që do të realizohen deri në momentin e aplikimit për autorizim për përdorim masiv të kurës së mundshme do të shqyrtohen nga shkencëtarët e Federal Drug Administration, që është autoriteti i SHBA për verifikimin e sigurisë dhe licencimin e një kure. Përveç kësaj, kompania thotë se kura potenciale do t’u nënshtrohet edhe auditeve të brendshme.

Sipas Bourla janë ende edhe tre faza për t’u kaluar deri kur të përmbushet ai që njihet si “caku i sigurisë” së vaksinës. Së pari ai thotë se vaksina duhet të provojë se është efektive në pjesën më të madhe të pacientëve. Së dyti të jetë e sigurtë dhe pa efekte anësore dhe së treti, kompania duhet të provojë se mund të prodhojë në sasi të mëdha dhe brenda standardeve më të larta këtë vaksinë.

Pfizer po bashkëpunon me kompaninë gjermane BioNtech SE në zhvillimin e vaksinës dhe më herët përmes deklaratave zyrtare ka deklaruar se në fund të tetorit do të mësonte nëse produkti i saj ishte efektiv ndaj koronavirusit apo jo.

Deklarata e kompanisë, një prej më të mëdhave në botë në fushën e farmaceutikës mbërrin pasi Presidenti amerikan, Donald Trump u premtoi mbështetësve të tij gjatë një fushatës për rizgjedhje që një vaksinë do të ishte gati para zgjedhjeve të 3 nëntorit.

Pfizer mohoi se është nën presion politik për të zhvilluar vaksinën para kësaj date. Kompania thotë se po “punon me shpejtësinë e shkencës dhe jo të politikës” dhe sipas kësaj shpejtësie kërkesa për autorizim të vaksinës do të mbërrinte në javën e tretë të nëntorit.

Një javë më vonë, ka parashikuar edhe kompania Moderna që të kërkojë të njëjtin autorizim për një produkt tjetër të sajin.

Ndërkohë, një sërë kompanishë të tjera, si Johnson & Johnson, Eli & Lilly dhe AstraZeneca kanë deklaruar pezullimin e testimeve të vaksinës së tyre pas efekteve anësore që ato kanë pasur tek disa pacientë, por pa specifikuar më shumë për llojin dhe dëmet e efekteve anësore në fjalë.

Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.