Është mbyllur raundi i dytë i ndeshjeve në grup në Champions League. Bajern Mynih, Ajaks, Mançester Siti dhe PSG janë skuadrat me pikë të plota pas 2 ndeshjesh, kurse Atalanta, Leverkusen, Benfika dhe Lila nuk kanë marrë asnjë pikë. Disa skuadra të mëdha janë në krizë dhe raundi i tretë i ndeshjeve do të jetë shumë i nxehtë. “Top” dhe “flop”, gola dhe fraza e ditës, ja çfarë ndodhi në ndeshjet e mesjavës në Champions.
Nga klubet që kanë gabuar më pak, tre janë ata që nuk kanë pësuar gol: PSG, Mançester Siti dhe Ajaksi. Holandezët, pa De Ligt, kanë forcuar mbrojtjen, por pa lëvizur asgjë në lojën sulmuese. Shënojnë gol prej 16 ndeshjesh në fazën në grupe. Në dy ndeshjet e këtij edicioni kanë regjistruar të njëjtin rezultat, 3-0, ndaj Lilës dhe Valencias. Pas fishekzjarrëve të sezonit të shkuar, Herik ten Hag i ka dhënë më shumë ekuilibër skuadrës. Ndeshja e radhës është me Çelsin dhe duhet konfirmimi. Janë tre klubet e mëdha që kanë vetëm një pikë. Përveç Interit, edhe Real Madrid e Totenhem kanë vënë në rrezik kualifikimin. Ndeshja e radhës për Realin është në Turqi me Gallatasarajin dhe nëse nuk ndryshon klasifikimi, do të jetë fatale për Realin.
Ishte një raund ndeshjesh me 5 gola fluturimthi, shumë të bukur për t’ua parë. Me siguri që goli i Uillian të Çelsit në Francë është pak më i veçantë sa i takon teknikës dhe kurajës. Duartrokitje meritojnë edhe Minamino (Salcburg) ndaj Liverpulit, Zhoao Feliks (Atletiko) ndaj Lokomotivës së Moskës, Suarez (Barcelona) ndaj Interit dhe Semedo (Olimpiakos) ndaj Crvena Zvezdës.
![](https://gazetasi.al/wp-content/uploads/2019/10/gnab.jpg)
TOP DHE FLOP — Sulmues që festojnë pas çdo gjuajtjeje dhe të tjerë që humbin raste pa fund. Serge Gnabri, 24 vjeç, për 4 golat ndaj Totenhemit, kishte nevojë vetëm për 6 gjuajtje. Nuk është lojtari i parë gjerman që shënon 4 gola në Champions, e ka bërë edhe Mario Gomez me Bajernin në fitoren 7-0 ndaj Bazelit. Fytyra e trishtë është ajo e Arkadiusz Milik të Napolit, i cili në 8 tentativa nuk shënoi asnjë gol. Dy traversa, 4 jashtë dhe 2 gjuajtje të devijuara. Ndonjëherë nuk duhet perfeksioni për të shënuar gol. Denis i Bryzhit, në dygolëshin ndaj Real Madrid, gaboi në stopim dhe ishte duke u rrëzuar para se të gjuante. Portierët çorientohen edhe kështu.
![](https://gazetasi.al/wp-content/uploads/2019/10/nojer.jpg)
FRAZA E DITËS — “Më vjen keq për Hugo Lloris” (Manuel Nojer pas fitores 7-2 të Bajernit ndaj Totenhemit). Solidaritet mes portierësh.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.