.png)
Partia Demokratike, ashtu siç kishte paralajmëruar, ka nxjerrë një tjetër emër kryebashkiaku të dënuar më parë dhe që kanë marrë sipas saj mandatin në kundërshtim me ligjin e dekriminalizimit.
Pas denoncimit të Qerim Ismailajt të Bashkisë së Mallakastrës, sekretari i përgjithshëm i PD-së Gazment Bardhi në një dalje për mediat tha se Partia Demokratike i ka kërkuar sot zyrtarisht Prokurorisë së Përgjithshme verifikimin e të kaluarës kriminale të kryebashkiakut të Matit, Agron Malaj.
Sipas Bardhit, Agron Malaj rezulton se ndodhet në kushtet e ndalimit për të kandiduar në një funksion publik pasi sipas tij është dënuar me vendim gjyqësor të formës së prerë për armëmbajtje pa leje dhe sipas ligjit për dekriminalizimin i ndalohet kandidimi përjetë në një funksion publik.
“Sot Partia Demokratike i ka kërkuar zyrtarisht Prokurorisë së Përgjithshme verifikimin e të kaluarës kriminale të Edi Ramës së Matit.
Agron Malaj rezulton se ndodhet në kushtet e ndalimit për të kandiduar në një funksion publik.
Ai është i dënuar me vendim gjyqësor të formës së prerë për armëmbajtje pa leje, dhe sipas ligjit për dekriminalizimin, i ndalohet kandidimi përjetë në një funksion publik”, u shpreh Bardhi.
Bardhi ndër të tjera tha se “Partia Demokratike i kërkon Prokurorisë së Përgjithshme dhe më pas Komisionit Qendror të Zgjedhjeve të veprojë pa asnjë vonesë me administrimin zyrtar të vendimit të Gjykatës së Matit dhe për heqjen e menjëhershme të mandatit për Kryetarin e Bashkisë së Matit, Agron Malaj”.
Ky është kryebashkiaku i pestë i denoncuar nga PD pas 30 qershorit.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
