Partia Demokratike i ka kërkuar Prokurorisë së Përgjithshme të verifikojë pastërtinë e figurës së Valdrin Pjetrit, i cili është kryebashkiaku i ri i Shkodrës i dalë nga votimet e 30 qershorit.
Kërkesa mban firmën e sekretarit të Përgjithshëm të PD, Gazment Bardhi.
Sipas Partisë Demokratike ekzistojnë të dhëna, indicie dhe dëshmi publike se Valdrin Pjetri nuk mund të ushtrojë funksion publik për shkak te ligjit të dekriminalizimit.
“Në vitin 2001-2002, Valdrin Pjetri ka qenë i arrestuar/ndaluar në Itali (ka jetuar në Firence, Itali) dhe, më pas, ndaj tij është marrë masa e dëbimit nga autoritetet përgjegjëse italiane. Nga verifikimi i të dhënave të sistemit TIMS rezulton se shtetasi Valdrin Pjetri nga periudha 2002 – 23.03.2010 nuk ka udhëtuar në asnjë rast të vetëm në drejtim të Italisë, çka përbën një indicie për saktësinë e të dhënave të bëra publike më parë”, thuhet në letrën e sekretarit të Përgjithshëm të PD.
Nëse këto të dhëna publike verifikohen nga Prokuroria, do të thotë se Valdrin Pjetri nuk mund të marrë detyrën e kryetarit të Bashkisë së Shkodrës.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.