Partia Demokratike e cilëson buxhetin 2020, të cilin mazhoranca e miratoi në Komisionin e Ekonomisë, si buxheti i oligarkëve.
“Parlamenti votoi në Komisionin e Ekonomisë buxhetin që jep 120 milionë euro në vit për 13 koncesione, ndërsa nuk ka para për rritjen e rrogave. Parlamenti u tall sot me djersën e shqiptarëve, duke mbrojtur dhe duke votuar në komisionin e ekonomisë buxhetin e vënë në shërbim të koncesioneve korruptive të disa oligarkëve”, deklaroi nga selia blu, Dorian Teliti.
Sipas demokratëve, buxheti konfirmon se qeveria nuk ka prioritet qytetarët, por klientët e Ramës që po pasurohen duke grabitur paratë e shqiptarëve.
“Janë 120 milionë euro që do t’u paguhen financuesve të Edi Ramës përmes koncesioneve që i kanë marrë pa garë, pa transparencë dhe në kundërshtim me interesin publik. Kjo është qeveria që shikon vetëm interesin e xhepit të vet dhe është qeveria e vetme, të paktën në rajon, që nuk ka asnjë politikë zhvillimore, asnjë politikë lehtësuese për qytetarët dhe ekonominë e vendit”, vijoi Teliti.
PD e vlerëson buxhetin 2020 buxhet të thellimit të varfërimit të shqiptarëve, i falimentimit të bizneseve, i mbijetesës së familjeve dhe që nuk parashikon rritje rrogash.
Teliti përsëriti qëndrimin e demokratëve se me ardhjen në pushtet do të anulojnë çdo koncesion dhe PPP korruptiv.
“Paratë që u janë vjedhur shqiptarëve do të shkojnë për rimëkëmbjen e ekonomisë së shqiptareve të ndershëm që e duan Shqipërinë dhe duan ta ndërtojnë të ardhmen e tyre këtu, në vendin e tyre”, mbylli deklaratën e tij, Dorian Teliti.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.