.png)
Pas ish-kreut të bandës së Vlorës, Myrteza Çaushi, një tjetër i dënuar me burgim të përjetshëm kërkon të lërë qelinë në vendin tonë.
Bëhet fjalë për Taulant Balliun, anëtar i bandës famëkeqe të vitit 1997, të Tan Kateshit në Elbasan, ka kërkuar të lirohet, pasi ka kryer 25 vite burg.
Balliu e ka argumentuar kërkesën me pretendimin se nëna e tij jeton e vetme, pasi i vëllai ka ndërruar jetë.
Taulant Balliu është i njohur ndryshe me pseudonimin “Cikja”.
Ai ka qenë krahu i djathtë i “kapos” së grupit kriminal të ngritur në vitin 1997 në qytetin e Elbasanit, Tan Kateshi.
Gjatë trazirave ai është mbajtur si një prej ekzekutorëve kryesor të bandës, të përbërë nga 30 persona, 11 prej të cilëve janë vrarë.
Banda, aktivitetin e saj kryesor e ka nisur me grabitje në akset rrugore, vendosje gjobash, vjedhje me dhunë të makinave etj.
Mbi ta rëndojnë një sërë akuzash dhe tashmë shumica e tyre ose kanë vdekur ose janë në burg duke vuajtur dënimin.
Prej disa kohësh, përpjekje për t’u liruar nga burgu po bën edhe ish-kreu i bandës së Vlorës, Myrteza Çaushi.
I ashtuquajturi Zani është dënuar me burgim të përjetshëm, me pretendimin se ka kryer dënimin dhe kërkon lirimin me kusht.
Seanca e sotme për “të fortin e Vlorës” në trazirat e vitit 1997, u shty përsëri sot, pasi avokati kërkoi kohë për konkluzionet.
Gjykata vendosi që seanca e radhës të mbahet më 9 prill.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
