Presidenti Ilir Meta priti në një takim të beftë kreun e Partisë Demokratike, Lulzim Basha. Basha ngjiti shkallët e Presidencës rreth orës 10:00. Takimi ka përfunduar rreth orës 11:00 të paradites së të mërkurës dhe në përfundim të tij asnjëra prej palëve nuk ka dalë me një deklaratë.
Presidenca njoftoi se në orën 17:00, kreu i shtetit do të dalë në një konferencë për shtyp. Këto zhvillime mbërrijnë një ditë pas takimit të Presidentit Ilir Meta me ekspertët e misionit faktmbledhës të Komisionit të Venecias, të thirrur në Tiranë nga mazhoranca për dhënien e një opinioni mbi nismën e socialistëve për shkarkimin e Presidentit.
Të hënën, Meta doli para Komisionit Hetimor Parlamentar që do të ndërtojë raportin mbi shkeljet që do të gjejë në vendimet dhe deklaratat e Presidentit të Republikës. Raporti do të kushtëzohet fort nga opinioni i Venecias. Vetë Venecia pritet që të dalë me opinion në datë 11 janar, në mbledhjen e radhës në sesion plenar.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.