.png)
Fatmir Xhafaj ka folur pas dorëheqjes nga detyra e ministrit të Brendshëm, e ndërsa e ka quajtur shërbimin për më shumë se një vit në këtë detyrë si mision të vështirë dhe sfidë të madhe, nuk ka detajuar motivet që e çuan t’i paraqiste kryeministrit Edi Rama letrën e dorëheqjes.“Pas më shumë se 1 viti në krye të Ministrisë së Brendshme, me vullnetin tim, i kam paraqitur Kryeministrit Edi Rama dorëheqjen time si Ministër i Brendshëm, duke e falënderuar për besimin e dhënë me emërimin në këtë detyrë të rëndësishme”, është shprehur Xhafaj në mesazhin e tij. “Erdha në këtë detyrë për një mision të vështirë, shërbeva me pasion, me modesti dhe me devotshmëri në shërbim të shtetit, të ligjit dhe të qytetarëve.”
Duke u shprehur krenar për arritjet e deritanishme në krye të ministrisë së Brendshme, Xhafaj ka vijuar “ Sfidat kanë qenë tepër të mëdha, por jam krenar se në krye të një ekipi me integritet e përkushtim në Ministrinë e Brendshme dhe Policinë e Shtetit, kemi mundur të arrijmë suksese shumë të rëndësishme në forcimin e rendit dhe sigurisë në vend, disa prej tyre të konsideruara të pamundura për vite të tëra.”Në fund ai ka falënderuar ekipin, kolegët, miqtë dhe familjen, “si dhe të gjithë ata që më vlerësuan, besuan dhe më mbështetën gjatë gjithë kësaj periudhe.”Xhafaj ka shprehur gjithashtu vlerësim dhe mirënjohje për forcat e rendit, “ Vlerësim dhe mirënjohje nga zemra për të gjithë ata gra dhe burra në uniformë, për gjithçka bënë gjatë kësaj periudhe në luftë me krimin dhe paligjshmërinë.”
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
