Gazeta Si – Partizani nuk shkoi më shumë se barazimi 1-1 në ndeshjen e parë të turit të parë eliminator të Ligës së Kampionëve. Të kuqtë dominuan në ‘Air Albania’ ndaj Bate Borisov, por gabuan shumë në sulm, duke e lënë kualifikimin të hapur për ndeshjen e kthimit që luhet në fushë neutrale në Hungari.
Pjesa e parë ndeshjes ishte e mbushur me raste për kampionët e Shqipërisë, të cilët shpërdoruan njëri pas tjetrit. Loja pati ritëm të lartë, ndërkohë që edhe Bate rezikoi në disa momente.
Në pjesën e dytë dy skuadrat e ulën ritmin, por bjellorusët goditën në rastin e parë që krijuan me sulmuesin Antilevski. Partizani reagoi mirë dhe barazoi me Tedi Carën në një goditje këndi. Të kuqtë morën zemër dhe e e zhvendosën lojën në gjysmëfushën e Bates. Murataj ishte pa fat, pasi goditi shtyllën me një gjuajtje të bukur.
Trajneri Zekiç freskoi sulmin në fund, duke aktivizuar edhe Eros Grezdën, ish-lojtarin e Kombëtares, por shifrat nuk ndryshuan dhe gjithçka u mbyll në barazim, 1-1.
Një fitore të madhe ka arritur sot Ballkani, ekipi kampion i Kosovës. Skuadra e trajnerit Ilir Daja mundi 2-0 Ludogorets të Bullgarisë, duke iu afruar kualifikimit në turin e dytë. Korenica dhe Zyba shënuan golat e triumfit në stadiumin ‘Fadil Vokrri’.
Suksesi Ballkanit merr vlera të mëdha, duke ditur që kundërshtari është një ekip me eksperiencë në kupat e Europës dhe me një buxhet shumë më të madh se kampionët e Kosovës. Tani Dajës dhe të tijve u duhet të menaxhojnë sa më mirë ndeshjen e kthimit.
Struga kampione e Maqedonisë së Veriut barazoi pa gola me Zalgiris në Lituani. Skuadra e trajnerit Shpëtim Duro ka lënë gjithçka të hapur për ndeshjen e kthimit, ku mund të ketë më shumë shanse për të kaluar në turin e dytë eliminator të Championsit.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.