Gazeta Si – Partizani fiton 0-1 ndeshjen e parë të turit të dytë të Ligës së Konferencës ndaj Atletik Eskaldes të Andorrës. Kjo fitore i hap rrugën kualifikimit për në turin e tretë skuadrës kampione të Shqipërisë, që duhet thënë se gjithsesi nuk shkëlqeu në këtë 90-minutësh.
Skuadra e trajnerit Zekiç vuajti në pjesën e parë, jo për shkak të presionit të kundërshtarit, që ishte shumë modest e madje kishte ndryshuar edhe trajnerin një ditë më parë, por sepse ishte shumë e paqartë në lojë. Thuajse asnjë rast për shënim në 45 minutat e para.
Goli i vetëm i ndeshjes u shënua pak pas fillimit të pjesës së dytë nga sulmuesi Kristian Mba. Ai i rrëmbeu topin portierit kundërshtar në zonë dhe e dërgoi në rrjetë. Da Silva humbi një rast shumë të mirë për golin e dytë, më pas të kuqtë shpërdoruan edhe raste të tjera.
Eros Grezda e nisi nga minuta e parë këtë ndeshje, por qëndroi në dhomat e zhveshjes, pasi u zëvendësua nga trajneri Zekiç në pushim. Debutuan me fanellën e kuqe mbrojtësi Kocijan, titullar, dhe mesfushori Gjelbërim Taipi, i aktivizuar në pjesën e dytë.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.