Gazeta Si - Partizani, ekipi kampion i Shqipërisë, ka nisur një revolucion në strukturat e tij drejtuese dhe teknike. Klubi i kuq synon të hapë një cikël të ri fitues dhe ka zgjedhur kroatin Zoran Zekiç për stolin, pasi largoi italianin Xhovani Kolela, edhe pse ai u shpall kampion.
Arbër Abilaliaj ka marrë detyrën e drejtorit sportiv të klubit kryeqytetas, ndërsa pas kuintave dhe veçanërisht për merkaton e të kuqve vepron Adrian Aliaj, ish-lojtari i Kombëtares së Shqipërisë. Dhe për të shkuar tek ai cikli fitues që mendohet, kryeqytetasve u nevojitet kualitet në skuadër.
Për momentin ka vetëm një zyrtarizim, ai i sulmuesit Alber Keko që vjen nga Korabi. Ka zëra për një afrim të mundshëm te Eros Grezdës, ish-lojtarit të Kombëtares, po ashtu edhe të Odise Roshit, një tjetër emër i njohur i kuqezinjve. Më tepër janë deduksione logjike, duke ditur lidhjen e tyre me Aliajn që prej kohësh bën punën e menaxherit. Këta lojtarë njihen edhe nga trajneri i ri, sepse kanë luajtur në Kroaci.
Nëse këta dy lojtarë i bashkohen Partizanit, vërtet skuadra mund të bëjë atë kapërcimin e nevojshëm në kualitet. Megjithatë, nuk është e lehtë dhe projekte të tilla zakonisht marrin kohë, sepse lojtarët duhet të përshtaten me idetë e stafit teknik dhe me njëri-tjetrin.
Europa do të jetë një tregues i mirë për Partizanin: çfarë mund të bëjë në këtë nivel, por edhe se sa i përgatitur mund të jetë për të qenë faktor kryesor sezonin e ardhshëm në Superiore. Planet janë të mëdha, por çdo gjë matet në fushën e blertë.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.