.png)
Gazeta Si – Partizani ka mbërritur në Letoni tri ditë para ndeshjes me Valmeirën, që luhet të enjten në mbrëmje në ‘Skonto Stadium’ të Rigës. Kjo tregon qartë rëndësinë që klubi i kuq i ka kushtuar kësaj ndeshjeje, pasi synon që të shkojë me çdo kusht në ‘Play-off’, ku do të ndeshet me humbësin e çiftit Astana-Ludogorets.
Trajneri Zoran Zekiç ka kryer stërvitjen e parë në Letoni dhe sot do të japë udhëzimet e fundit për të tijtë. Ai do të ketë të gatshëm edhe mbrojtësin e djathtë Andi Hadroj, i cili kishte probleme fizike. Për dëmtim do të mungojnë mbrojtësi Sembene dhe sulmuesi Mensah.
Kundërshtari është disi i panjohur dhe ditët e fundit ka shitur dy lojtarë të rëndësishëm të formacionit, një favor ky për Partizanin. Gjithsesi, vlerësimi në kampin e kuq është në shkallën maksimale, sepse një rezultat pozitiv në transfertë ndihmon shumë për kualifikimin.
Partizani, ekipi kampion në fuqi i Shqipërisë, është i vetmi që vazhdon të luajë në kupat e Europës. Vllaznia dhe Egnatia u eliminuan që në turin e parë eliminator të Ligës së Konferencës. Tirana kaloi një tur, por u eliminua në të dytin nga Beshiktashi.
Të kuqtë u eliminuan në turin e parë të Championsit nga Bate Borisov, por më pas kaluan në Ligën e Konferencës dhe në turin e dytë kaluan Atletik Eskaldes të Andorrës. Tashmë synojnë eliminimin e Valmeirës dhe të shkojnë në ‘Play-off’, pse jo dhe në fazën e grupeve të këtij kompeticioni.
Më 12 gusht Partizani do të luajë edhe një miqësore me ekipin e Romës, në stadiumin ‘Air Albania’.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
