.png)
Gazeta Si – Partizani barazon përkohësisht Tiranën në krye të klasifikimit të Superiores, me 37 pikë. Të kuqtë mundën 3-0 Erzenin në një ndeshje të mbushur me episode dhe që e luajtën thuajse të gjithën me 10 lojtarë.
Që në minutën e 5-të Gueje e la Partizanin me 10 vetë, pasi u ndëshkua me karton të kuq për një ndërhyrje ‘killeri’ ndaj një lojtari të Erzenit. Një vendim që u mor pasi arbitri pa më qartë pamjet në VAR. Ndeshja nisi në mënyrën më të keqe për kryeqytetasit, por duket se ky episod u dha forcë atyre.
Në fundin e pjesës së parë Rrapaj shënoi golin e avantazhit me një goditje dënimi. Në fillim të pjesës së dytë Da Silva dyfishoi shifrat dhe më pas ishte radha e Hotit që të shënonte edhe golin e tretë për Partizanin. Erzeni, surpriza e madhe e këtij sezoni, u fik në mënyrë të çuditshme, duke mos përfituar aspak nga superioriteti numerik.
Një rezultat surprizë arriti sot Bylisi, që fitoi 0-1 në fushën e Laçit. Goli i Ruçit u dha 3 pikë të çmuara ballshiotëve, që kanë fituar terren në tabelën e renditjes. Në ndeshjen tjetër të javës së 22-të, Teuta mundi 1-0 Kukësin me gol të Grudës.
Kjo javë mbyllet të dielën me sfidat Kastrioti-Tirana dhe Egnatia-Vllaznia.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
