Partizani dhe Tirana janë rikthyer frikshëm në javën e tetë të Superiores dhe duket e ajo ndërprerje e kampionatit u ka shërbyer skuadrave kryeqytetase për të sistemuar shumë gjëra. Një fitore me shumë vlera ajo 1-3 e Partizanit në stadiumin “Loro Boriçi” ndaj Vllaznisë. U duk se kjo ndeshje do të mbyllej në barazim, 1-1, por shkodrani i të kuqve, Erald Çinari, realizoi në shtesë golin e avantazhit dhe pas tij edhe Asani. Melo dhe Krymi kishin shënuar në pjesën e parë. Me këtë fitore Partizani ngjitet në vend të tretë, me 14 pikë, po aq sa ka edhe Tirana.
Skuadra e trajnerit Ardian Mema ka mundur 2-1 Laçin në stadiumin “Selman Stërmasi”, ku trajneri i ri i kurbinasve, Armando Cungu, ka debutuar me humbje. Dunga dhe Kale realizuan për bardheblutë golat e një fitoreje me shumë vlera. Tirana, ashtu si dhe Partizani, janë vetëm një hap larg Teutës kryesuese pas kësaj jave. Sfida e Korçës mes Skënderbeut dhe Kukësit nuk prodhoi gola dhe dy skuadrat ndanë nga një pikë.
Luftëtari-Bylis ishte ndeshja e parë që u zhvillua sot, pasi në Gjirokastër nuk luhet me drita. Ballshiotët nuk janë thyer edhe këtë radhë, por kanë marrë një pikë të rëndësishme në fushën e Luftëtarit. Për t’u theksuar është fakti se portieri i Bylisit, Isli Hidi, vazhdon të bëjë goleadorin e ekipit, teksa ka shënuar golin e tretë në kampionat, të gjithë me penallti. Të premten Teuta mundi Flamurtarin në Elbasan 1-0.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.