Jo rrallë sporti dhe politika kryqëzohen dhe njerëz të ndryshëm kërkojnë të japin mesazhin e tyre në situata të caktuara. Paolo Maldini, aktualisht drejtues i Milanit, me anë të një postimi në Instagram, e ka shprehur hapur mbështetjen e tij ndaj Guaido, president “de facto” i Venezuelës.
Venezuela po përjeton një situatë mjaft delikate kohët e fundit. Jo më larg se dje, me mijëra persona në kryeqytetin Karakas e kanë manifestuar hapur mbështetjen e tyre ndaj Juan Guaido, liderit të opozitës që në mes të janarit u njoh si president i vendit nga shumë shtete, edhe pse qeveria Maduro vazhdon të tregojë forcën e saj, duke mbajtur një qëndrim të dhunshëm ndaj qytetarëve.
Paolo Maldini, në mesazhin e postuar në profilin e tij në Instagram, shkruan: “Venezuela e lirë”. Drejtuesi i Milanit është mjaft i ndjeshëm ndaj situatës në Venezuelë, sepse Adriana Fosa, bashkëshortja e tij prej vitit 1994, është me origjinë venezueliane.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.