.png)
Në internet po qarkullojnë video me pamje tronditëse, të cilat tregon se si njerëzit e prekur nga koronavirusi në Kinë bien pa ndjenja në rrugë, ndërkohë që shërbimet e emergjencës shëndetësore vrapojnë për të dhënë ndihmën e parë. Video tregon se njerëzit e prekur mund të bien nga momenti në moment dhe nëse nuk marrin ndihmë, në pak minuta mund të vdesin.
Numri i personave të vdekur në Kinë ka shkuar 41, ndërsa janë konfirmuar edhe 1200 raste të tjera që janë të infektuar. Mediat ndërkombëtare kanë bërë me dije se harta e virusit është zgjeruar duke përfshirë SHBA-në, Europën dhe Australinë.
Deri në këto momente mendohet se në SHBA janë të prekur dy persona nga virusi, në Francë 3, në Australi është konfirmuar një rast në Melburn, në Singapor 3 persona të prekur, në Tailandë 5, në Japoni 3 dhe në Korenë e Jugut 2 persona, ndërsa në Mbretërinë e Bashkuar mendohet të ketë disa raste, por janë konfirmuar ende nëse janë mbartës të koronavirusit apo kanë një virozë sezonale. Gjithashtu, mediat kanë njoftuar se të gjitha rastet që janë konfirmuar në botë, kanë qenë vizitorë në Kinë disa ditë më parë.
Koronavirusi ishte i panjohur më parë për shkencën dhe shkakton një infeksion të rëndë akut në rrugët e frymëmarrjes, ku simptoma të ndryshme përfshijnë ethe dhe kollë. Deri më tani nuk ka një kurë specifike apo një vaksinë.
Gjatë së premtes edhe në vendin tonë Ministria e Shëndetësisë urdhëroi Institutin e Shëndetit Publik për të marrë masa për sa i përket koronavirusit. Sipas urdhrit, Instituti i Shëndetit Publik, duhet të përgatisë udhëzimet e duhura për survejencën, hetimin epidemiologjik dhe menaxhimin e rasteve, duke zbatuar rekomandimet e Organizatës Botërore të Shëndetësisë. Një rol të madh do të kenë të gjitha spitalet e vendit, pasi duhet të përforcojnë survejencën e infeksioneve të rënda respiratore akute. Ndërkohë që OBSH ende nuk ka një udhëzim për masat strikte që duhet të marrë një vend.
Kina prej disa ditësh ka vendosur në karantinë të gjithë provincën Hubei, kryeqyteti i së cilës, Wuhani, është edhe qendra e shpërthimit të koronavirusit. Izolimi i provincës Hubei do të prekë të paktën 20 milion njerëz në 10 qytete, përfshirë edhe Wuhanin, ku u shfaq virusi. Në total 13 qytete do të jenë nën mbikëqyrje të vazhdueshme, duke vendosur në izolim plot 50 milionë njerëz në të gjithë Kinën, ku janë mbyllur shumë biznese dhe rrugët janë të boshatisura.
Ky virus i tmerrshëm u shfaq në prag të festës së Vitit të Ri Kinez dhe ka detyruar autoritetet që të anulojnë të gjitha aktivitetet festive të përgatitura më parë. Gjithashtu, po ndërtohet dhe një spital specifik për të izoluar të infektuarit.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
