Kryetari i Komunës së Tuzit Nik Gjeloshaj u mor në pyetje në Prokurorinë Themelore të Shtetit në Podgoricës, për shkak të padisë penale kundër tij lidhur me protestat e 25 shkurtit në Tuz të Malësisë.
Gjeloshaj tha para gazetarëve se ndjehet i ofenduar nga padia kundër tij, por siç u shpreh ai “respektoi institucionet dhe me qetësi pret vendimin për këtë çështje”.
Zoti Gjeloshaj këmbënguli në qëndrimin e tij se atë ditë kishte mbrojtur Kushtetutën dhe si kryetar i komunës e ka detyrim të mbrojë ekonominë e vendit.
“I qëndroj mendimit se ky ishte një vendim politik dhe se fjala ishte për një qasje diskriminuese. Kjo u konfirmua pas 48 orësh, kur masat ndaj pandemisë për Komunën e Tuzit u ndryshuan”, tha zoti Gjeloshaj.
Prokuroria Themelore në Podgoricë ka njoftuar se kryetari i Komunës së Tuzit, Nik Gjeloshaj po hetohet lidhur me deklaratën e tij në protestat e 25 shkurtit ku konfirmohet “ekzistimi i bazës së dyshimit se është kryer vepra penale e thirrjes për rezistencë”. Po ashtu padi penale është ngritur edhe ndaj dy zyrtarëve tjerë të Komunës së Tuzit.
Qytetarët e Tuzit me shumicë shqiptare, me 25 shkurt bllokuan aksin rrugor Podgoricë-Tuz, në shenjë proteste ndaj masave kundër pandemisë.
Kryetari i Komunës së Tuzit Nik Gjeloshaj urdhëroi të gjitha bizneset që të hapen dhe të mos zbatojnë masat e miratuara të Ministrisë së Shëndetësisë kundër pandemisë. Ky veprim i zyrtarëve vendor ka sjellë reagime të ndryshme në opinionin e Malit të Zi. (VOA)
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.