Zllatan Ibrahimoviç po e kalon këtë periudhë emergjence në Suedi, një vend që ka zgjedhur të mos mbyllet në karantinë, ndryshe nga gjithë pjesa tjetër e botës. Në shtëpinë e tij në Malmoe, sulmuesi veteran mund të reflektojë më mirë për rrugën që do të ndjekë pas përfundimit të pandemisë.
E ardhmja e tij duket se nuk do të jetë kuqezi. Nga njerëzit pranë tij është mësuar se suedezi është i zhgënjyer nga ndryshimet që po pëson Milani. Ibrahimoviç nuk do të ketë më në klub dy miqtë e tij, Paolo Maldinin dhe Zvonimir Bobanin. Kjo dyshe ishte duke programuar skuadrën e sezonit të ardhshëm, me Ibrahimoviçin në qendër të projektit, pas impaktit shumë pozitiv që sulmuesi pati gjatë 3 muajve si kuqezi. Por skenari ka ndryshuar tashmë.
Boban nuk është më drejtues i Milanit, ndërsa Maldini mund të largohet në korrik. Ka fituar linja e Ivan Gazidis, me të cilin Ibrahimoviç do të ketë një takim në fund të sezonit. Por, ata që e njohin mirë suedezin, betohen se është shumë e vështirë, për të mos thënë e pamundur, që ai të pranojë projektin e administratorit të Milanit. Me shumë mundësi, Ibrahimoviç do të varë “këpucët në gozhdë” pas këtij sezoni.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.