.png)
Gazeta Si - Në një mega-operacion të Policisë së Shtetit, janë arrestuar gjatë gjithë natës së mbrëmshme dhe deri në orët e para të mëngjesit, 233 shpërndarës të drogës në të gjithë vendin, të cilët kishin në shënjestër të veprimtarisë së tyre kriminale nxënësit e shkollave.
Në të gjitha qarqet e vendit, janë shkatërruar 23 rrjete kriminale në Tiranë, Durrës, Korçë, Elbasan dhe Vlorë, në operacionin policor të koduar “Tempulli”, i cili vazhdon ende.
Në një konferencë për shtyp, kreu i Policisë së Shtetit, Muhamet Rrumbullaku, tha se fokusi i operacionit ishte goditja e shpërndarjes së drogës në afërsi të shkollave, por edhe ambienteve të tjera.
Në total, Rrumbullaku tha se janë lëshuar 296 masa sigurie arrest në burg dhe janë kontrolluar 356 ambiente të ndryshme.
Prej tyre, janë ekzekutuar 233 masa sigurie arrest me burg, 19 persona janë arrestuar në flagrancë, ndërsa 82 persona janë shpallur në kërkim.
Gjatë këtij megaoperacioni, si rezultat i kontrolleve në banesa dhe në ambiente të tjera, deri tani janë sekuestruar 13 armë zjarri (2 kallashnikovë, 10 pistoleta dhe 1 pushkë), 5 armë gjahu/sportive, 1 elektroshok, 8 armë të ftohta (thika, doreza metalike); 134.5 kg kanabis, 364 fara kanabisi, 1.2 kg kokainë, mijëra doza kanabisi, kokaine dhe heroine, qindra doza MDMA, tableta ekstazi, sasi të drogave sintetike GAB dhe Poppers, 23 peshore elektronike, 3 mjete për përpunimin dhe ndarjen e lëndëve narkotike në doza; 225 celularë, 35 automjete, 1 801 000 lekë të rinj, 38 845 euro, 6100 paund, 1100 dollarë. Gjithashtu, janë sekuestruar 4 motomjete, 12 targa, pajisje si të Policisë dhe dokumente false.
Shpërndarësit në shkolla
Sipas Rrumbullakut, një pjesë e madhe e të arrestuarve janë anëtarë të 23 grupeve kriminale, në qytete si Tirana, Durrësi, Korça, Elbasani e Vlora.
Operacioni policor u zhvilluar në kuadër të masave për garantimin e sigurisë në shkolla. “Prej disa ditësh janë marrë një sërë masha të reja, për sigurinë në shkollë. Një nga masat është parandalimi i shitjes së narkotikëve pranë shkollave. ‘Tempulli’ për goditjen e aktivitetit kriminal të shpërndarjes së lëndëve narkotike pranë shkollave, bareve, lokaleve, restoranteve”, u shpreh Drejtori i Përgjithshëm i Policisë së Shtetit.
Lëndë narkotike e re
Gjatë këtij operacionit janë sekuestruar lëndë narkotike si kokainë, heroinë, kanabis, armë zjarri, vlera monetare të konsiderueshme, etj.
Gjatë operacionit në fjalë, u zbulua drogë xhelatinë që futej në Shqipëri me anë të postës nga jashtë vendit.
Siç shihet në foton e siguruar nga Gazetasi.al, kanabisi i përpunuar në kushte laboratorike, vinte nga Kanadaja në vendin tonë i fshehur në konserva peshku e qese me kapsolla.
Sipas burimeve paraprake, droga e ardhur nga Kanadaja është shumë më e fortë se kanabisi që kultivohet brenda vendit, me 5 apo 6 fish më shumë efekt, si pasojë edhe me e shtrenjtë.
Një kuti si ato të konservave, kushton 50 euro, ndërsa të tjerat shkojnë deri në shifra 300 euro. Seksioni Kundër Narkotikëve në Policinë e Tiranës sekuestroi edhe 3.7 kg kokainë gjatë operacionit të sotëm dhe 10 kg kanabis. Ndërkohë, mësohet se janë sekuestruar edhe 30.000 euro, 45 milionë lekë të vjetra, 6000 paund, 12 automjete, 3 motomjete, 78 aparate celularë dhe 12 peshore elektronike”, raporton gazetari.
22 prej personave të arrestuar në Tiranë u kapën në zonën e Kombinatit. Mësohet se në pranga ka përfunduar edhe një menaxher i një lokali në ish-Bllok, pasi në ambientet e tij shpërndahej droga.
I pranishëm në këtë konferencë për shtyp, Ministri i Brendshëm Taulant Balla tha se gjatë kontrolleve janë zbuluar edhe lloje droge që nuk dihej se ekzistonin në vendin tonë.
“Ajo që mbetet më problematike është se po ulet mosha e atyre që përdorin për herë të parë lëndë narkotike, veçanërisht në gjimnaze. Është shtuar dhe përdorimi i drogërave sintetike. Janë zbuluar drogëra gjatë kontrolleve që ne nuk e dinim se ekzistonin në Shqipëri“, tha Balla mes të tjerash.
Sipas Ballës, “Ministria e Brendshme synon të ngrejë në ditët në vijim një aleancë ndërinstitucionale dhe mbarëqytetare kundër përdorimit të drogës. Dua të garantoj sot më shumë se më parë, prindërit e gjyshërit që dërgojnë fëmijët në shkolla se Paketa jonë e Sigurisë po jep rezultatet e para dhe do të bëjmë të pamundurën që brenda këtij perimetri, grupet kriminale të mos afrohen. Do dyfishohen format e dënimit për shpërndarjen e shitjen e lëndëve narkotike brenda perimetrit të sigurisë së shkollave“.
Operacioni në rrethe
Më shumë se 18 persona janë arrestuar nga drejtoria vendore e qarkut të Korçës, ndërsa pritet që edhe 5 persona të tjerë të vihen në pranga.
Ndërkohë në Elbasan janë arrestuar 9 persona dhe 5 të tjerë janë shpallur në kërkim. Një prej të arrestuarve është identifikuar si efektivi i policisë, Saimir Hysa.
Policia në këtë qytet ka sekuestruar doza kanabisi me peshë 1 kilogramë, tre armë, dy thika, doreza, peshore dhe shuma parash.
Operacioni po vijon edhe në Vlorë, ku bëhet me dije se dhjetëra persona janë vënë në pranga nga forcat RENEA. Mes të arrestuarve në qytetin bregdetar është edhe një grua me fëmijë latant.
Hetimet për rastin kanë nisur afro 6 muaj më parë. Autoritetet mësohet e kanë dokumentuar këtë aktivitet kriminal me përgjime, duke i mbajtur në vëzhgim anëtarët dhe një pjesë edhe me blerje të stimuluara.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
