Gazeta Si – Nxënësi ma në fund ka triumfuar përballë maestros: Arsenali i Artetës ka fituar trofeun e parë sezonal në Angli, pasi ka mundur me penallti Mançester Sitin e Pep Guardiolës në finalen e ‘Community Shield’.
Ishte një ndeshje e ekuilibruar dhe e hapur, që u zhbllokua në minutën e 77-të nga ‘qytetarët’ me Palmer, lojtarin e ri që zuri vendin e Haland. ‘Topçinjtë’ barazuan në minutën e 101-të, kur Siti po bëhej gati për festën. Një top i gjuajtur nga Trosard u devijua nga Akanxhi dhe përfundoi në rrjetë.
Te penalltitë Arsenali u tregua më i saktë dhe fitoi edhe falë një super Ramsdejl. Gabuan nga pika e bardhë De Bryjne dhe Rodri.
Ndeshja foli më shumë për Mançetser Sitin, që u duk më në formë dhe më pak i frikësuar. Djemtë e Guardiolës krijuan raste me Julian Alvarez dhe Rodrin. Në pjesën e dytë Arsenali e ngriti kokën: Havertz u ndal nga Ortega, ndërsa Martineli nuk mundi ta çonte topin në rrjetë. Siti shpëtoi edhe nga lëvizjet e Saka dhe 13 minuta para fundit shënoi me Palmer. E majta e tij mposhti Ramsdejl, që më pas shpëtoi portën nga goli i dytë në rastin e Foden.
U akorduan 8 minuta shtesë, që shkuan më pas në 11 dhe pikërisht në sekondat e fundit Arsenali barazoi, duke bërë që fituesi të përcaktohej nga penalltitë. Portieri Ramsdejl neutralizoi gjuajtjen e Rodrit, duke i dhënë skuadrës së tij trofeun për herë të 17-të në histori.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.