Koronavirusi bllokon edhe Zvicrën. Pas anulimit të “Sallonit të Gjenevës”, që duhej të zhvillohej nga data 5 deri më 15 mars, vjen edhe vendimi zyrtar i Federatës Zvicerane të Futbollit për pezullimin e të gjitha ndeshjeve të “Super League”, që është niveli elitar i futbollit në këtë vend, si dhe të “Challenge League”, që korrespondon me Kategorinë e Parë në vendin tonë.
Autoritetet zvicerane kanë ndaluar organizimin e eventeve me më shumë se 1000 persona të paktën deri më 15 mars. Për momentin nuk ka një datë për luajtjen e ndeshjeve që do të shtyhen, ndërkohë që po diskutohet edhe mundësia e zhvillimit të ndeshjeve me dyer të mbyllura për javët në vazhdim të kampionatit, siç ka ndodhur në Itali, në zonat e prekura nga koronavirusi.
Në Zvicër janë regjistruar zyrtarisht deri tani 8 raste të personave të prekur nga koronavirusi. Taulant Xhaka dhe Ermir Lenjani, dy nga lojtarët e Kombëtares që luajnë në Zvicër, përkatësisht me Bazelin dhe Sionin, do të bëjnë pushim të detyruar paktën dy javë.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.