Politike

Ndasi se si duhet të përdoren paratë për dëmet e tërmetit

Mbledhja e parë e Komitetit Kombëtar të Rindërtimit, që përbëhet nga Qeveria përfaqësues të shoqërisë civile, ndërtues, Fondi i Zhvillimit dhe sipërmarrës nxorri në pah dallimet e thella mes idesë së Qeverisë dhe idesë së shoqërisë civile për menaxhimin dhe përdorimin e fondeve për dëmet e shkaktuara nga tërmeti.

Kryeministri Edi Rama kërkoi që në fillim që fondet të grumbulloheshin në një zë të vetëm që do të menaxhohet nga ish-ministri i Financave, Arben Ahmetaj dhe më pas të ndaheshin më pas duke financuar projekte, duke u premtuar transparencë dhe mbikëqyrje shoqatave dhe personave të tjerë që kanë kontribuar në këtë fond.

“Do të ishte e mira që i gjithë fondi të bashkohej dhe mbi atë bazë të ndaheshin projektet dhe secili të ndiqte projektet. Gjëja më me vlerë që shoh unë këtu është që të arrijë i gjithë projekti i menaxhimit dhe rindërtimit, i gjithë ky fond është një dhe pastaj në këtë tryezë kontributet janë të ndryshme. Unë mendoj që ky komitet të trajtojë çështje përtej fondeve. E gjithë bota i ka këto gjëra. Askush s’duhet të ketë shqetësim që ky fond që kam kaluar unë nuk po përdoret në mënyrë korrekte”, tha Kryeministri Rama.

Imami Elvis Naçi pranoi kundërshtitë që kishte me Kryeministrin në këtë pjesë. Ai kërkoi që në këtë komitet të ishin që të gjithë të barabartë dhe nënkuptoi që gjithsecili të menaxhojë fondet e veta. Mekanizmin që synohet të ngrihet e sheh si një mundësi të mirë për ta siguruar këtë transparencë.

“Duke qenë në një tryezë dhe bashkë besoj që do të jetë shumë më e shpejtë mundësia për t’i ndihmuar. Jo që këtu do të bëhet transparencë gjithsecili për atë që ka mbledh, por të kontrollojmë edhe transparencën e njëri-tjetrit. Pra, barazia në këtë tryezë, megjithëse në këtë tryezë është Kryeministri i Shqipërisë është hapi i parë. Duhet të shkojë jo vetëm urgjentisht ndihma, por edhe profesionalisht, që ajo ndërtesë të rrëzohet me tërmetin tjetër. Fondet do të jenë të qarta, të dukshme dhe ne do t’i shikojmë nga fillimi deri në fund se ku do të shkojnë”, deklaroi ai.

Bashkimin e fondeve dhe mbikëqyrjen e shpenzimit të tyre nga Komiteti Kombëtar i Rindërtimit e kërkoi edhe inxhinieri Arben Meçe, që foli për një dëm mbi 500 milionë euro.

Kundër bashkimit të fondeve në një zë të vetëm ishte edhe gazetari Marin Mema, por me statusin e përfaqësuesit të shoqërisë civile, që së bashku me shqiptarët e Amerikës kanë mbledhur një shumë të konsiderueshme donacionesh.

“Ne jemi për koordinim, jo për centralizim, të jetë kjo shumë e qartë. Jemi këtu si zëri dhe syri i shqiptarëve vetëm për këtë qëllim dhe besoj se kjo ka vlerë më shumë se çdo ministri. Ne duam t’i qëndrojmë kësaj deri në fund, sepse duam t’u dalim shqiptarë me sy e zë”, deklaroi Mema.

Kreu i Shoqatës së Ndërtuesve, Artan Dulaku mirëpriti pjesëmarrjen e shoqërisë civile dhe shoqatave të bamirësisë, por i kujtoi qeverisë së shumat e grumbulluara dhe të ofruara prej tyre nuk mjaftojnë për të përballuar këtë situatë. Ai propozoi një tjetër skemë.

“Në Durrës, por edhe në Tiranë, kemi një fond gjigant banesash të pashfrytëzuara. Mendoj se thelbi i mbledhjes së sotme duhet të jetë, jo të merremi me fondacionet, ato mirë se të vijnë, por do të vazhdojnë edhe dy javë dhe kam një lajm të keq për zotin Kryeministër, ngarkesën do ta mbajë si gjithmonë i zoti i shtëpisë, që është Qeveria. Fondacionet bëjnë punën e tyre dhe janë të mirëpritur, por fatura 100, 200, 300 milionë euro, do të bjerë mbi shpatullat e zotit Ahmetaj, zotit Kryeministër, që duhet ta shpërndajnë në shpatullat e atyre që do merren me këtë punë”, deklaroi ai.

Propozimi i kreu të Shoqatës së Ndërtuesve, për të strehuar në apartamentet e mbetura stok në Durrës e Tiranë të pastrehët që la tërmeti nuk u hodh poshtë nga Elvis Naçi, por ai kërkoi që ndërtuesit t’i shisnin këto apartamente në kuadër të bamirësisë, pra me koston e ndërtimit.

“Shqipëria ka ardhur koha të krijojë disa standarde. Ai që do të na japë shtëpinë do të na ulë çmimin. Zotit Rama po ia them këtu, o do të bëhet diçka siç duhet, ose unë me Marinin në tavolinat e tjera nuk do të jemi këtu. Do të dalim veç me fondacione të vogla, por jo të bëhet si tek tezgat. Nëse do bëhet si tek tezgat, më mirë pak dhe faqebardhë”, tha ai.

Si kryetar i këtij Komiteti, ish-ministri i Financave, aktualisht kryetar i Komisionit të Ekonomisë në Parlament propozoi që Shqipëria t’i kërkojë Fondit Monetar Ndërkombëtar që të marrë pjesë në buxhetin e fatkeqësive. Ai shtjelloi edhe konceptin e tij se çfarë nënkupton me buxhet fatkeqësie.
.
“Buxheti i rindërtimit të jetë brenda buxhetit të shtetit, pra të jetë si një zgjatje e buxhetit të shtetit, të jetë aty që të mbetet në kohë”, tha ai.

 

Më Shumë