.png)
Marrëveshja është mbyllur. Napoli do t’i paguajë Veronës 12 milionë euro për të marrë shërbimet e ish-mbrojtësit të Partizanit dhe kapitenit të Kosovës, Amir Rrahmanit. Lojtari pritet që shumë shpejt të kryejë vizitat mjekësore, ndërkohë që marrëveshja përfshin edhe 2 milionë euro të tjera bonus.
Zakonisht, merkatoja kërkon shumë durim, por drejtuesit e Napolit kanë zgjedhur rrugën më të shkurtër, blerjen menjëherë të mbrojtësit të Veronës. Pas bisedimeve me klubin ku luan Rrahmani, është arritur edhe akordi financiar. Amir Rrahmani, i cili mbush 26 vjeç pas një muaji e gjysmë, shihet si një përforcim i denjë për mbrojtjen e Napolit. Futbollisti kosovar po zhvillon një sezon të shkëlyqer me fanellën e Veronës, ashtu si dhe mbrojtësi shkodran, Marash Kumbulla, edhe ai në shitje e sipër. Marrëveshja mes dy klube parashikon që Rrahmani të bashkohet në verë me Napolin, pra ta mbyllë këtë sezon me Veronën.
Progresi i Amir Rrahmanit ka qenë i jashtëzakonshëm, çka tregon se ai është një lojtar shumë serioz dhe ambicioz. Të gjithë e kujtojnë kur luante titullar me Partizanin vite më parë që në moshë shumë të re. Në kampionatin shqiptar erdhi nga Drenica dhe paraqitja e mirë me të kuqtë bëri që mbrojtësi kosovar të kalonte në Kroaci, te RNK Split fillimisht dhe më pas te Dinamo e Zagrebit. Në vitin 2019 Rrahmani bëri hapin e madh, duke kaluar në Serinë A me Veronën, ku tregoi vlera të padiskutueshme dhe tashmë është një lojtar i Napolit.
Kosovari bashkohet kështu me Elseid Hysajn, për të cilin tani ka më shumë shanse të qëndrojë se të largohet. Rrahmani ka qenë pjesë edhe e Komëtares shqiptare, por trajneri De Biazi e la jashtë Europianit të Francës dhe mbrojtësi më pas kaloi te Kosova.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
