.png)
Mbante titullin e Mjeshtrit të madh. Muhamet Liko, ishte një ndër humoristët më të talentuar të estradës shqiptare. Për rreth 41 vite, Liko nuk ishte thjesht një figurë e ekranit, por një njeri tepër i dashur për publikun. Duke mos mundur të fitonte betejën për jetën këtë të enjte, për shkak të sëmundjes së zemrës që e përndiqte prej kohësh, ai sot nuk gjendet në skenën e teatrit “Petro Marko”, në Vlorë.
Ishte pikërisht ky vendi ku nisi gjithë karriera e tij. Që prej vitit 1978, me daljen e parë në skenë, Meti, ashtu si e quanin të gjithë, i shtoi skenës një tjetër talent që do të mbahet mend nga shqiptarët ndër vite. Dëshmi televizive na tregojnë se që prej kohës kur ishte fare i ri, parodisti ishte spikatur për talentin e tij. Ai u dallua gjatë olimpiadave amatore të qendrës së punës në qytetin e Vlorës, ku ishte pjesëtar i ndërmarrjes së përpunimit të drurit. Që nga ajo kohë, nisi të rrëmbente një sërë çmimesh. Luajti dhjetra role në estradën e Vlorës. Një prej roleve më të parapëlqyera, për publikun ishte “Agai dhe qypi me mjaltë”, ku siç ndodhte në repertorin e parodistëve, ata shpesh herë ironizonin ngjarjet e përditshme në shoqërinë tonë.
Në një interviste televizive shumë kohë më parë, bashkëshortja e tij u shpreh se Meti ishte një njeri shumi i mire i cili i’a kishte dalë në gjithçka. E sot në këtë ditë të trishtë për familjen dhe jo vetëm, vlerësime të shumta bëjnë të kuptosh se mbi të gjitha, ai ia doli të fitojë zemrat e shqiptareve kudo ku ndodhen. Ashtu si e përcaktoi dhe mbesa e tij po në të njëjtën intervistë, se ishte me fat që kishte gjysh Metin, edhe Shqipëria ndër vite ka pasur fatin të ketë pjesë së skenës, një humorist të mirënjohur e të veçantë. Duke promovuar shfaqjen e fundit që parodistët realizuan në teatrin e qytetit të Vlorës “Ka një masazh për ty”, nën petkun e humorit të tij ai është shprehur: “Të isha 20 vjet më i ri do të bëja namin, do t’ju mbysja me parodi”. Dhe është shumë e qartë që përpos viteve, grupi më i vjetër i humorit në vendin tonë sa herë dolën në skenë, na treguan se ishin ata 4 djemtë e rinj të cilët, nuk rreshtën kurrë së dhëni buzëqeshje për qytetarët Shqiptarë.
Kohët e fundit Muhamet Liko u vlerësua nga Presidenti si “Mjeshtër i Madh”, i cili shprehur edhe ngushëllimet e tij për ndarjen nga jeta e parodistit dhe si “Qytetar Nderi” në vendlindjen e tij, por ai mbante prej kohësh edhe urdhrin “Naim Frashri të Klasit të I-rë” e shumë medalje të tjera. Nuk kishe si të mos vlerësoje talentin e tij që prej vitesh, i’u ka dhuruar buzëqeshje mijëra qytetarëve. Për shkak të sëmundjes Muhamet Liko nuk ishte as pranë miqve të tij në intervistën më të fundit që ata kanë pasur në emisionin Xing me Ermalin, por batutat e tij nuk mungua në këtë emision, nëpërmjet lidhjes së drejtpërdrejtë që u realizua me të.
Përpara dy ditësh së bashku me parodistët Afrim Agalliu e Agron Hamo, ai u shfaq në skenën e teatrit “Perto Marko” në Vlorë, ku përgëzoi edhe parodistët e rinj të estradës së Vlorës, e më pas u nis për në Itali për të kryer një ndër kontrollet periodike, për sëmundjen e tij, por fatkeqësisht kjo do të ishte edhe hera e fundit për të që do të ngjitej në skenë.
Ashtu siç e përcaktoi, edhe Ministrja e Kulturës Elva Margariti në deklaratën e saj, vendit tonë ju shtua një dhimbje më shumë, pasi çdo kush është hidhëruar se nuk do të shohë më humorin e artistit, të cilin ishim mësuar ta shihnim hera herës në skenën e Al Pazar-it. Parodistët e Vlorës prej dekadash kanë qenë një trupë profesioniste që gjithnjë janë vlerësuar nga publiku. Një trupë profesioniste me artistë të afirmuar, ku fillimet i kishte në vitin 1967, prej kohësh i ka udhëhequr pasioni për punën dhe për të sjellë humorin e tyre që do të pëlqehet ndër vite. 4 artistët vlonjatë, Afrim Agalliu, Agron Hamo, Mano Kapllani dhe Muhamet Liko, kanë ditur më së mirë që të jenë në brendësi të shoqërisë dhe problemeve të saj, duke i kthyer ato në humor e duke sjellë gëzim në shtëpinë në çdo shqiptari brenda dhe jashtë kufijve.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
