Mos hapni llafe që nuk do jem në Vlorë”, tha kryeministri Edi Rama pas më shumë së gjysmë ore fjale të mbajtur gjatë fillimit të punës për Parkun e Shtëpisë së Pavarësisë që do të lidhë bulevardin “Ismail Qemali” me buzën e detit dhe Lungomaren.
“Kam qenë në Vlorë edhe para se të bëhesha kryetar, në Vlorë isha edhe kur u bëra kryetar i PS, në Vlorë jam edhe tani kryeministër, do jem edhe kur të mos jem më, madje më shumë atëherë se do të kem më pak angazhime”, tha Kryeministri Rama, qëndrimi i të cilit nuk u kuptua nëse ishte pasojë e afeksionit të hershëm që ai ka për Vlorën apo edhe më shumë, për të qenë sërish drejtues i këtij qarku në zgjedhje.
Kryeministri njoftoi gjithashtu se ndërtimi i Tunelit të Llogarasë do të fillojë në fillim të vitit të ardhshëm, pa specifikuar muajin.
“Për tunelin është bërë gara e projektit, s’po vë data e muaj se për gjithçka mund të ndryshojë por në pjesën e parë të vitit të ardhshëm, ne do fillojmë ndërtimin e tunelit të Llogarasë, ama pjesa nga Uji i Ftohtë në Orikum përmes Radhimës do rindërtohet e do bëhet një zonë që ata që kanë bizneset e shtëpitë të kenë forcë tërheqëse më te madhe”, tha ai
Rama tha gjithashtu se qeveria e tij ka bërë shumë më shumë nga ç’mund të kishte bërë opozita nëse do të ishte në pushtet. Vendimet e fundit, sipas tij, për rritje pagash dhe taksë zero biznesit të vogël nuk kanë lidhje me zgjedhjet
“Atyre që thonë pse u kujtove tani, u them që unë jam kujtuar edhe kur zotrote flije gjumë, çdo ditë e çdo natë, por te rrisësh kontributet nga shteti për njerëzit, të heqësh komplet TVSH, tatimin e fitimit mbi një kategori sic është ajo e sipërmarrësve të vegjël nuk është fjalë goje dhe nuk bëhet se do ti ta bësh, por sepse do, dhe mund ta bësh kur janë krijuar kushtet për ta bërë”- tha Rama.
Kryeministri foli edhe për rritjen e pagave infermierëve dhe mjekëve
“Zgjedhjet ne i fitojmë si me këto si pa këto, kjo nuk diskutohet. Se përtej denglaxhinjve dhe atyre që kanë pakënaqësi, nuk ka qenë e lehtë për asnjë familje, të përballojë gjithë këtë stres, që nga nëntori kur ra tërmeti, populli është shumë i mençur. Populli do flasë prapë siç ka folur dhe do flasë drejt dhe do t’i japë zotit atë që është e zotit, Cezarit atë që i takon Cezarit”.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.