Gazeta Si - Prokuroria e Lezhës ka kërkuar 8 vite burg për 17-vjeçarin Florian Përvathi, i cili në muajin janar të këtij viti vrau me armë bashkëfshatarin Lek Lekgjonaj.
Prokurori ka ngritur akuzat e vrasjes për gjakmarrje dhe armëmbajtjes pa leje për adoleshentin.
Sipas organit të akuzës, Florian Përvathi e ka kryer krimin me paramendim, pasi vëllai i viktimës i kishte vrarë babain kur Floriani ishte 4 vjeç.
Pistoletën e krimit, prokuroria dyshon se 17-vjeçari e gjeti në Shkodër 1 vit më parë.
Lek Lekgjonaj u ekzekutua me armë mesditën e 24 janarit 2022 në fshatin Manati të Lezhës.
Autori 17-vjeçar nuk u largua nga vendngjarja pas krimit. Aktualisht ai është në burgun e të miturve në Kavajë.
Që prej vrasjes së babait të Florjanit, familja e Lekgjonajt ishin larguar nga fshati.
Ndue Lekgjonaj, vëllai i Lekës, ishte ai që i mori jetën të atit të adoleshentit në vitin 2009.
Atë ditë nëna e Florit piu fostoksinë duke i dhënë fund jetës. Djaloshi mbeti jetim që në moshën 4-vjeçare.
Floriani u rrit me idenë për të çuar nderin në vend dhe për t’i marrë gjakun babait. Ai gjeti momentin në janarin e këtij vitit duke ekzekutuar Lek Lekgjonajn.
I rritur pa të dy prindërit, duket se 17-vjeçari e ka pasur një plan të fshehtë për të vënë në vend sipas tij drejtësinë e munguar.
Për këtë ngjarje ka reaguar dhe misionari i pajtimit të gjaqeve, Pjetër Gjoka. Ai tha se është befasuar, pasi prej vitesh nuk kishte konflikte mes palëve.
Gjoka është shprehur se në 2009-ën, nga vetë viktima ka pasur një tentativë për pajtim.
Gjithashtu ai theksoi se dhe nga fisi i Pervathëve u është thënë se ka një pajtim të momentit, por jo një zgjidhje të përhershme të situatës.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.