.png)
Mjeku Tritan Kalo është tërhequr nga Komiteti Teknik i Ekspertëve për koronavirusin.
Lajmin e ka bërë me dije vetë Kalo përmes një statusi në rrjete sociale, ku hedh edhe akuza të forta ndaj politikës.
“4 marsi shënon edhe fundin e bashkëpunimit tim zyrtar me këtë grup të emërtuar: “Komiteti i përhershëm për Infeksionin e përhapur nga Coronavirusi i ri”. Ju jam shumë mirënjohës për mirëbesimin që treguat ndaj eksperiencës dhe përkushtimit tim. Nëse dikush nga kritizerët e gjithologët e ka dëshiruar këtë vend ai/ajo e ka atë tashmë të lirë”, shkruan mjeku Kalo.
Sipas tij, edhe kësaj here politika arriti të përçajë mjekët. Po ashtu, mjeku nuk i kursen ironitë ku shkruan se në vendin tonë janë 3 komitete; ai i qeverisë, i Presidentit dhe i opozitës.
“Si kurdoherë edhe kësaj here “PORDHITIKA” e bëri të mundur t’i përçajë mjekët në qëndrimet dhe në kontributin e tyre, për t’u përballur me këtë “flamë mbarëbotërore”…. Kemi ekzistencën e njëkohshme të tre Komiteteve Zyrtare apo jo: 1- atë të Qeverisë aktuale, 2- atë të Presidencës/LSI-së dhe 3- atë të Partisë Demokratike, ose Opozitës në një term më të gjerë….Në një kohë kur duhet bashkëveprim tej përkatësive partiake, ne mjekët jemi të vendosur në tre llogore. Turp dhe shkuar TURPIT…Nuk e imagjinoja kurrë se karriera dhe makutëria do të mbërrinte në një pikë të tillë, që edhe përballë një sfide ekzistencialiste kombëtare do të ishim të ndarë në “tre stane”, shkruan Kalo.
Ndër të tjera, ai thotë se nuk do të heqë dorë nga kontributi, për t’u shërbyer atyre që besojnë në punë dhe profesionalizëm.
“Unë këtu jam dhe kurrë nuk do heq dorë nga kontributi, për t’u shërbyer atyre që besojnë në Punën, Përkushtimin dhe Profesionalizmin tim, por edhe për të dhënë ndihmesën time në mbarëvajtjen e punëve për t’u përballur me këtë Pandemi, nëse një gjë e tillë do vijojë ende të më kërkohet”, përfundon Kalo.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
