Gazeta Si – Ndeshja përmbyllëse e javës së 28-të të Serisë A, kryesfida mes Napolit dhe Milanit, është fituar thellë nga skuadra e Piolit, 0-4. Të udhëhequr nga Leao dhe Brahim Diaz, kuqezinjtë dominuan dhe u ngjitën në vend të 3-të në klasifikim. Raundi i parë mes këtyre dy skuadrave në prag të Championsit shkon për Milanin.
Ishte një ndeshje pa histori në 'Maradona'. Brahim Diaz i dhuroi Leaos një top perfekt për golin e parë vetëm pas 17 minutash. Më pas ishte vetë spanjolli që dyfishoi shifrat. Në pjesën e dytë Leao shënoi një gol fantastik me një diagonale me të majtën. Serinë e golave e mbylli belgu Saelemaekers, që kaloi mes mbrojtësve të Napolit dhe mposhti Meret.
Napoli tashmë ka 16 pikë avantazh nga Lacio e vendit të dytë dhe titulli nuk vihet në diskutim, por humbja e sotme ishte turpëruese për Spaletin. Trajneri i Napolit pati edhe një debat me Maldinin në pushim të ndeshjes, për shkak të mënyrës së festimit të Leaos.
Mbrojtja e Napolit ishte në një ditë të errët, po ashtu edhe sulmuesi Simeone, që zëvendësoi Osimhen të dëmtuar.
Milani është ngjitur në kuotën e 51 pikëve, duke kaluar Interin dhe Romën që kanë nga 50 pikë. Kjo fitore e ngroh shumë skuadrën kuqezi në prag të sfidës së parë çerekfinale të Championsit.
Në ‘Maradona’ ndodhi edhe një epiosod i shëmtuar. Në shkallët e stadiumit shpërtheu një zënkë absurde mes tifozëve të Napolit. Këta të fundit para ndeshjes kontestuan presidentin Aurelio De Laurentis.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.