.png)
Presidenti Ilir Meta iu rikthye edhe një herë akuzave ndaj kryetarit të Këshillit të Emërimeve në Drejtësi, Ardian Dvorani duke akuzuar për shkeljen flagrante të procesit të emërimeve të anëtarëve të Gjykatës Kushtetuese. Kreu i shtetit në konferencën e jashtëzakonshme bëri të ditur se do të dërgojë fakte shtesë në Prokurori për kallëzimin penal të bërë ndaj Dvoranit. Presidenti publikoi letërkëmbimet mes Kuvendit dhe Kreut të Këshillit të Emërimeve në Drejtësi Ardian Dvorani për çështjen e emërimeve në Gjykatën Kushtetuese që solli më pas një konflikt mes Kreut të Shtetit dhe maxhorancës.
“Më 8 nëntor kreu i Kuvendit ndër të tjera i thotë Ardian Dvoranit: Në këto kushte për të garantuar të drejtën e çdo kandidati në votim, Kuvendi kërkon të informohet brenda ditës nga KED mbi ecurinë e procesit të emërimeve nga Presidenti. Përgjigjja e Dvoranit pa mbledhur KED: Ditën e sotme, pra për datën 8, pranë KED nuk ka ardhur ndonjë njoftim nga Presidenti për të emëruar një nga kandidatët e listës që ka emëruar Këshilli”, tha Meta. Por presidenti shtoi se Dvorani dhe kryeparlamentari ishin në dijeni, pavarësisht se Dvorani shprehej se “gjithashtu dhe në faqen zyrtare nuk është bërë publike ushtrimi i së drejtës. Prandaj vlerësoj që zonja Vorpsi konsiderohet e emëruar si gjyqtare e Kushtetueses.’
“Në datën 5 nëntor… se jemi në përpjekjen finale për të bërë shtet dhe përpjekjes për grusht shteti në Shqipëri… në këtë letër të Presidentit të Republikës që i është dërguar kryetarit të Kuvendit, avokates së Popullit dhe për dijeni gjithë ambasadave që nuk i zë gjumi për drejtësinë, Presidenti me këtë vendim paraprak synon respektimin e normës Kushtetuese të zbatimit të radhës me anëtarët e Gjykatës Kushtetuese”, tha ndër të tjera Meta. Më tej sipas kreut të shtetit, duhet të merret edhe SPAK me Dvoranin. Për kreun e shtetit gjithçka bëhet për të kapur Gjykatën Kushtetuese, e ku në fund vetë Dvorani do të bëhet anëtar i Gjykatës. Sipas tij, Dvoranit duhet t'i ndalohet ushtrimi i detyrës në krye të KED-së.
“Do të shkoj vetë në Venecia, nuk do të lejoj grushtin e shtetit”
Pabesi dhe të pamoralshëm ndaj Venecias e ka cilësuar presidenti, votimin nga Kuvendi të ligjit për zhveshjen e kompetencave për betimin e anëtarëve të Gjykatës Kushtetuese, një ditë përpara se të vinte delegacioni në Tiranë për të diskutuar me palët për këtë çështje. “E ndryshon në errësirë të plotë, duke i dhënë përgjigje pyetjeve që kishte për komisionin e Venecias. Atentat i mazhorancës ndaj kushtetutës, me qëllim kontrollin e Kushtetutës. Kjo nuk do të pranohet kurrë nga Presidenti i Republikës. I kërkoj ndjesë komisionit të Venecias që u keqpërdor nga mazhoranca, në funksion për të mbuluar grushtin e shtetit. Nuk do të lejojmë grushtin e shtetit, në një polici antikushtetuese të shtetit, P-P-P, (Polici, Parti, Propagandë) do të marr pjesë në seancën plenare të Komisionit të Venecias ku do të njoh të gjithë të pranishmit me fakte edhe më të rënda se këto të përpjekjes për të realizuar një grusht shtetit”, tha Meta në konferencë për shtyp
Sipas tij, anëtari i Gjykatës Kushtetuese, nuk është sipas tij, portokalle në bahçen e Presidencës, ku vjen njëri e rrëmben dhe ikën.
“Së pari është përgjegjësia ime t’i qëndroj atij betimi që kam bërë me dorën dhe zemrën në kushtetutë deri në datën 24 korrik 2022. Çdo ditë grusht shteti ndaj shtetit të së drejtës dhe të drejtave kushtetuese të qytetarëve shqiptarëve. Nuk ekzistojnë mundësi që presidenti i republikës për shkak të avancimit të grushtit të shtetit të hiqet nga detyra e tij si kryetari i shtetit dhe nga misioni i tij për të mbrojtur Kushtetutën e Shqipërisë dhe shtetin e së drejtës”, theksoi presidenti.
Ai e cilësoi si qesharake thirrjen që Kuvendi i bëri Venecias, pasi vetë ky Komision ka përcaktuar dhe miratuar vetë në nenin 179 të Kushtetutës radhën e emërimeve të anëtarëve të Gjykatës Kushtetuese, me argumentin se mund të koha që presidenti të jetë i linjës së mazhorancës dhe kjo mund të sjellë kapjen e Gjykatës Kushtetuese me 6 anëtarë të saj.
Gjithashtu Meta u shpreh se Kuvendi mashtroi delegacionin e Venecias se ishte konsultuar me KED për këtë ligj të betimit të anëtarëve, duke publikuar shkresën e Dvoranit që i kishte drejtues presidentit që e mohonte një gjë të tillë.
Më tej duke iu përgjigjur pyetjeve të gazetarëve, kreu i shtetit u shpreh se Kushtetuta rrezikohet nga një grup mafioz. Ai u shpreh se detyra e Presidentit është që grushtit të shtetit ti përgjigjet me dekrete.
“Presidenti ka për detyrë që grushtit të shtetit ti përgjigjet me dekrete. Ka për detyrë ti drejtohet qytetarëve shqiptare në mbrojtje të Kushtetutës. Kushtetuta është e vetmja gjë që garanton unitetin tonë, pavarësisht se dikush është nga jugu dikush nga veriu, dikush është i krishterë dhe dikush mysliman, dikush është socialist dhe dikush demokrat, dikush ballist e dikush demokrat. Por e vetmja gjë që na bashkon në këtë shtet është vetëm Kushtetuta. Ju ftoj të përqendrohemi tek kjo çështje. Do të përpiqen t'ua largojnë vëmendjen me çdo lloj shashkash që hedhin majtas e djathtas, por kjo është çështja më e rëndësishme për qytetarët, mbrojtja e rendit kushtetues që kërcënohet nga një grup mafioz, jo nga PS, sepse PS ka meritën që ka bërë kushtetutën në 1998 dhe parimet nuk kanë ndryshuar. Por nga një grup mafioz që për fat të keq punon kundër interesave kombëtare dhe është armik i qartë i shtetit të së drejtës dhe drejtave të qytetarëve shqiptarë”, theksoi Meta.
Presidenti Ilir Meta deklaron se “KÇK” është zhurmë për të spostuar vëmendjen për të finalizuar kapjen e shtetit dhe instaluar grushtin e shtetit.
“KÇK është zhurmë për të spostuar vëmendjen tek përpjekja për të finalizuar kapjen e shtetit dhe instaluar grushtin e shtetit, sepse kjo është vetëm grusht shteti. Çdo italian jurist që e dëgjon është colpo di stato. Me ca letra ti bën grusht shteti. Nuk ka nevojë për tanke, gaz, por me ca letra mbyllet çdo gjë në një dorë. Gjithë paratë në një dorë, sovraniteti, integriteti janë në një dorë. Vetë Ali e vetë Kadi ka vetëm Maliq nuk ka as ligj as Kushtetutë”, përfundoi presidenti.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
