Presidenti i Republikës, Ilir Meta, mbajti sot një fjalim në Sesionin e 73-të të Asamblesë së Përgjithshme të Kombeve të Bashkuara në Nju Jork.
Në fjalën e tij në Debatin e Përgjithshëm “Shndërrimi i OKB-së në një organizatë të lidhur e të përshtatshme për të gjithë popujt” ai paraqiti qëndrimin e Shqipërisë lidhur me rajonin dhe çështjet kryesore ndërkombëtare.
“Vazhdojmë ta shohim OKB-në si një instrument shumëpalësh, përmes të cilit ruhet më së miri rendi paqësor ndërkombëtar.
OKB-ja u krijua me anë të një sërë përpjekjesh të vullneteve sovrane, të cilat kanë prodhuar një trup rregullash të kodifikuara dhe praktikash të mira si zgjidhje e përbashkët për problemet e përbashkëta.
OKB-ja as nuk ka një jetë të sajën, jashtë vullnetit të anëtarëve të saj, as nuk është imune ndaj ndryshimeve dhe zhvillimeve që ndodhin.
OKB-ja është rritur, ndërsa bota jonë është bërë gjithnjë e më shumë globale.
Demokracia, siguria, çështjet ekonomike, zhvillimet teknologjike dhe World Wide Web, çështjet mjedisore dhe shumë të tjera, janë gjithnjë e më shumë të pranishme në axhendën e OKB-së, ashtu siç dominojnë edhe në politikat tona të brendshme.
Shqipëria ndan dhe mban përgjegjësinë e saj për të qenë aktive në këtë debat, duke i shtuar e dhënë rëndësi pjesës sonë të rruzullit”, është shprehur Meta.
Kreu i shtetit theksoi se Shqipëria është pjesëmarrëse aktive në shumicën e misioneve të NATO-së në vendet e konflikteve, si në Irak, Afganistan, etj.
Fjalimi në sesionin vjetor të Asamblesë së Përgjithshme të Kombeve të Bashkuara, në diplomacinë ndërkombëtare, cilësohet si moment i rëndësishëm për shtetet dhe liderët botërorë.
Pjesëmarrja në debatin vjetor është moment kulmor ku krerët e shteteve paraqesin qëndrimin e vendeve që përfaqësojnë për çështjet e ndryshme ndërkombëtare.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.