.png)
Gazeta Si – Pas njoftimit për zbarkimin e Lionel Mesit në kampionatin amerikan (MLS), në SHBA dhe sidomos në Majemi, ka shpërthyer Mesi-mania, që ka përfshirë edhe NBA-në.
Gjatë ndeshjes së 3-të të finaleve për titullin kampion, ardhja e Mesit në qytet është lajmëruar në Jumbotron, kurse mes tifozëve kishte nga ata që kishin veshur 10-ën e Inter Majemit. Edhe disa lojtarë i kanë uruar mirëseardhjen yllit argjentinas.
Mes fansave të ‘Pleshtit’ ka yje të ndryshme që nuk e kanë humbur rastin për të përshëndetur mbërritjen e ish-lojtarit të Barcelonës dhe PSG-së nëpërmjet rrjeteve sociale. Antetokounmpo, që ka kuota të Nashville Soccer Club, i ka lënë takim në fushë, ashtu si Durant (që ka kuota te Philadelphia Union). Trae Young ishte i çmendur nga gëzimi, ndërsa Kyle Lowry, që luan te Majemi, doli në fushë me fanellën e Mesit tek Argjentina.
Ka nisur ndërkohë gjuetia për bileta për ndeshjen e debutimit të Mesit tek Inter Majemi. Data për t’u rrethuar me të kuqe është 21 korriku, kur klubi nga Florida do të luajë në Kupën e Ligës. Nga momenti i njoftimit për ardhjen e Mesit, çmimi i biletave është rritur menjëherë. Bileta më e lirë kushton 350 euro, një shifër më e lartë se për ndeshjen e 3-të të finaleve të NBA-së mes Majemi Hit dhe Denver (310 euro).
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
