.png)
Historia e një djali dhe një vajze nga Nju Jorku në këto kohë pandemie, tregon se dashuria nuk njeh kufij; ajo triumfon edhe përtej distancave të detyruara, edhe përtej panikut nga Covid-19. Teksa kalonte ditët e tij në izolim, nga ballkoni i tij, ai vërejti një komshie në pallatin përballë, e cila ashtu si ai, po qëndronte e vetmuar në tarracën e pallatit të saj. Me anë të një droni ai nisi t'i dërgonte mesazhe duke vendosur më pas një komunikim me të.
I can’t believe this actually worked and yes this is a real story pic.twitter.com/X5KbBl0qIe
— Jeremy Cohen (@jerm_cohen) March 22, 2020
Fotografi nga Bruklin, Jeremy Cohen 28 vjeç, mori famë pas publikimit të një videoje të tijën në rrjetin social TikTok. Në këtë video Jeremy përmes një droni ku kishte ngjitur numrin e celularit i kërkon vajzës, Tori, e cila ishte fqinja e tij, nëse kishte dëshirë të dilte më të në takim.
Jeremy shpjegoi në një video të mëparshme se, teksa qëndronte në ballkon, kishte vënë re Torin që kërcente gjatë kohës së karantinës në tarracën e pallatit ku ajo banonte. Kështu Jeremy Cohen vendosi ta përdorë kohën në karantinë në mënyrë sa më të mirë të mundshme, e kjo përfshinte dhe të pyeste Torin nëse kishte dëshirë të dilte me të në takim por në një mënyrë të re, kreative e argëtuese.
Tori e mori numrin e celularit të Jeremy të ngjitur në dron dhe pas një ore i dërgoi mesazh. Kështu nisi edhe bashkëbisedimi.
Takimi i parë zhvillohet në ballkonet e secilit përmes thirrjes me video në celular, duke qenë se të dy ata ishin të izoluar në karantinë.
Takimi i parë i të rinjve u bë viral në rrjete sociale e veçanërisht në TikTok ku videoja ishte hedhur me mbishkrimin “Ajo quhet Tori, është shumë e lezetshme dhe jam shumë i gëzuar që e takova”.
Pas një takimi të parë të suksesshëm, Cohen vendosi ta çonte këtë takim një hap tjetër.
Cohen vendosi ta takonte Torin jashtë shtëpisë i veshur brenda një tullumbaceje (apo topi gjigant të tejdukshëm që fryhet). Ai kishte marrë me vete në takim edhe një buqetë me lule.
Sapo Tori e pa Jeremy jashtë shtëpisë, brenda topit të tij gjigan, asaj nuk po i besohej, ndaj nisi të gajaset së qeshuri.
Çifti më pas doli për një shëtitje nëpër lagje. Teksa ecnin, madje u ndaluan edhe nga policia për thyerjen e rregullit të daljes nga shtëpia. Por polici e njohu Jeremy nga lajmet (të cilat kishin publikuar videot e kërkesës të Jeremy për takim me Torin) dhe vendosi të bëjë një selfie me të.
Secila prej videove të Jeremy që tregojnë ecurinë e takimit të tij me Torin ka mbledhur me miliona shikime në rrjetet sociale ku janë postuar.
Komentet e videove janë gjithashtu të shumta e ato shprehin entuziazmin e ndjekësve me fjali si “Shpresoj që ju të martoheni” apo “Kjo është historia më e bukur e që ma ka zbukuruar ditën këtë periudhë karantine”.
Të dhënat e publikuara nga John Hopkins University tregojnë se në SHBA ka mbi 165 mijë raste të konfirmuara me koronavirus dhe mbi 3180 vdekje. Nju Jorku momentalisht është epiqendra e koronavirusit me të paktën 1000 raste vdekjesh deri tani.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
