Në përpjekje për të mbajtur të ndezur shpirtin e protestës, një grup studentësh kanë menduar organizimin e një tubimi simbolik para Kryeministrisë këtë të enjte.
Në qendër të tubimit nuk do të jenë sloganet dhe as shifrat e pjesëmarrjes së protestuesve në të, por mesazhet e simbolika e përcjellë përmes pankartave dhe memeve që qarkulluan në rrjetet sociale dhe mediat tradicionale në 16 ditët e protestës studentore.
Protesta është thirrur në orën 10:00 të paradites së sotme para Kryeministrisë dhe zgjat deri në orën 16:00. Ajo organizohet një ditë pasi Kryeministri Edi Rama doli në një konferencë për shtyp për të njoftuar vendimet e Qeverisë për adresimin e tetë kërkesave të studentëve. Mes kërkesave ishte edhe ajo e rritjes së buxhetit për arsimin në masën 5 për qind të Prodhimit të Brendshëm Bruto.
Për këtë kërkesë, Kryeministri tha se nuk mund të realizohet, ndërkohë që për përgjysmimin e tarifave dhe zerimit të tyre për disa kategori tha se është marrë një vendim miratues nga ana e kabinetit qeveritar.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.