Diego Maradona i bën një “gol të madh” firmës së njohur të veshjeve “Dolce&Gabbana”. Argjentinasi i famshëm ka fituar gjyqin me shtëpinë e njohur të modës për përdorimin abuziv të emri dhe imazhit të ish-futbollistit. Gjykata e Milanos e detyron “D&G” të dëmshpërblejë Maradonën.
Çështja lidhet me një event promocional të organizuar në vitin 2016, në Napoli. Në këtë event, një modele kishte sfiluar e veshur me një fanellë të kaltër, të ngjashme me atë të Napolit, që mbante emrin e Maradonës dhe numrin 10.
Sipas Gjykatës së Milanos, përdorimi i emrit të Maradonës në këtë rast nuk është i lejuar pa konsensusin e vetë personit apo atij që ka të drejtën e imazhit të argjentinasit. Gjykata ka konstatuar se nuk janë respektuar rregullat e tregut dhe e ka konsideruar ilegale përdorimin e emrit të Maradonës nga “D&G”.
Kompania e njohur është e detyruar tashmë të dëmshpërblejë menjëherë ish-futbollistin. Maradona përfaqësohej në gjyq nga avokatët Korea, Tigani Sava dhe Albano. Ende nuk është bërë e ditur shuma financiare që shtëpia e modës duhet të derdhë në llogarinë e Diego Armando Maradonës.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.