Gazeta Si – Pas një jave ‘të ngrirë’, duket shumë afër mbyllja e operacionit që çon sulmuesin belg në Torino. Londinezët hidhen në sulm për Vlahoviç, kurse Interi kërkon me ngulm amerikanin e Arsenalit.
Që Lukaku dhe Alegri flasin vazhdimisht në telefon nuk është një sekret për askënd. Ka ndodhur pas finales së Championsit, kur trajneri juventin përfitoi nga humori i prishur i belgut, pasi kishte humbur vendin e titullarit tek Interi. Alegri menjëherë nisi tentativën për ta shtyrë drejt Juventusit.
‘Corriere dello Sport’ shpjegon se kontaktet mes të dyve kanë vazhduar gjatë turneut amerikan të Juventusit. Ka pasur edhe një telefonatë të fundit, që duket se e ka shtyrë përfundimisht ‘Big Rom’ drejt Torinos. Vullneti i sulmuesit për të veshur fanellën bardhezi nuk vihet në diskutim.
Në këtë situatë duhet bindur klubi që ka në pronësi kartonin e Lukakut, Çelsi. Duhet rritur oferta për të mbyllur shkëmbimin torturues Lukaku-Vlahoviç. Sipas gazetës italiane, në fillim të javës do të ketë edhe një telefonatë mes Londrës dhe Torinos për të rakorduar edhe për detajet e fundit të këtij shkëmbimi.
Çelsi kërkon sulmuesin serb dhe mund të afrojë 40 milionë euro, plus kartonin e Lukakut, që është gati të zbarkojë në Itali. Kalimi i bujshëm në Torino i ish-idhullit interist duket vetëm një çështje orësh.
Interi ndërkohë vazhdon kërkimet për një sulmues dhe tashmë prioritet është Balogun, amerikani i Arsenalit. Pasi ka humbur Skamakën, që zgjodhi Atalantën, dhe braktisi pistën ‘Morata’, klubi zikaltër është gati t’i ofrojë 35 milionë euro Arsenalit për sulmuesin në fjalë.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.