Gara e fortë e titullit e ka ndezur edhe më shumë luftën mes Mercedesit dhe Red Bull-it. Mercedesi ka kaluar së fundi në kundërsulm dhe po përgatit një betejë me Red Bull-in edhe jashtë piste.
Skuderia nga Brackley ka vendosur të bëjë një ankimim për rishikimin të duelit mes Ljuis Hemilton dhe Maks Vershtapen gjatë garës së Brazilit. Fjala është për atë duel shumë të diskutuar rrotë më rrotë në fillim të xhiros së 48-të, ku holandezi duket se e zgjeron trajektoren në kthesën 4 për të shtyrë jashtë piste rivalin dhe për të zbehur tentativën e tij për parakalim.
Max vs Lewis ⚔️
— Formula 1 (@F1) November 16, 2021
Every angle on their Lap 48 battle 👀 #BrazilGP 🇧🇷 #F1 pic.twitter.com/9NLHajCiPv
Për këtë rast komisarët e garës vendosën të mos ndërhyjnë me asnjë ndëshkim. Të martën Formula 1 ka publikuar pamje të reja të atij dueli, që sipas Mercedesit, evidentojnë shkeljet e pilotit holandez të Red Bull-it.
Në një Botëror të destinuar për t’u vendosur në frymën e fundit, ku çdo pikë ka rëndësi, skuderia anglo-gjermane ka menduar të luajë edhe këtë kartë, duke dashur të marrë hak për penalitetin ndaj Hemiltonit, për shkeljen që u raportua te komisarët e garës pikërisht nga Red Bull-i.
Ljuis Hemilton e fitoi gjithsesi Çmimin e Madh të Brazilit, por gjatë fundjavës nuk munguan polemikat nga dy drejtuesit kryesorë të dy skuderive, Toto Volf dhe Kris Horner. Kuptohet që tashmë është një luftë e hapur dhe sfida spostohet në Katar, në episodin e radhës.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.