Gazeta Si – Lufta mes klubit të PSG-së dhe sulmuesit Kilian Mbape sa vjen dhe ashpërsohet. PSG ka hequr imazhin e futbollistit nga stadiumi ‘Parc des Princes’ dhe ka ndaluar shitjen e fanellës së Mbape në dyqanet fizike të klubit, por ende jo në ato online.
Ky është kapitulli i ri i përplasjes mes futbollistit dhe klubit parisien. Mbape për momentin po stërvitet veçmas, me të ashtuquajturit "të padëshiruar". Ai është lënë jashtë grupit, në pritje të zhvillimeve të merkatos.
Lojtari nuk e ushtroi të drejtën e rinovimit, që mund ta bënte deri më 31 korrik. Ai ka refuzuar po ashtu edhe ofertën faraonike nga Arabia Saudite dhe synon që të largohet me parametra zero në 2024-ën. Lajmi bëhet i ditur nga gazeta angleze ‘The Sun’.
PSG kërkon 250 milionë euro për yllin e saj, një shifër që për momentin në Europë nuk mund ta ofrojë askush. Real Madrid, klubi që duket i destinuar për të ardhmen e sulmuesit francez, aktualisht po luan në ‘mbrojtje’. Drejtuesit madrilenë janë të ndërgjegjshëm për faktin se sa më shumë kalon koha, aq më shumë shfryhen edhe pretendimet financiare të PSG-së.
Një lamtumirë me parametra zero do të ishte e papranueshme për Al-Khelaifin. Do të ishte një dëm i madh ekonomik, pas shifrave monstruoze që janë investuar për kartonin (180 milionë euro) dhe pagën e sulmuesit.
PSG ka fshirë nga fotoja zyrtare edhe Marko Verratin dhe Nejmarin, që do të thotë se mesfushori dhe sulmuesi janë në shitje.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.