Politike

Lufta me KED-në, edhe Dvorani i përgjigjet me video Metës

Kryetari i Këshillit të Emërimeve në Drejtësi, Ardian Dvorani ka reaguar ndaj reagimit të zëdhënësit të presidencës, Tedi Blushi ku pretendohej se ai kishte deklaruar se nëse ndiqej penalisht, atëherë puna e këtij institucioni të drejtësisë pezullohej. Në një deklaratë për median, Dvorani e hedh poshtë se mund të ketë deklaruar se KED do të bllokohej nëse vetë ai do të ndiqej penalisht nga ana e prokurorisë. Ai thekson se gjatë kësaj kohe ka zgjedhur të jetë i përmbajtur në komunikimin publik dhe të mos përfshihen në lojërat mediatike, të cilat jo pak funksionarë publikë i kanë shumë për zemër, më shumë se sa kujdesin për të përmbushur detyrat që u ngarkon Kushtetuta e ligji, si edhe pritshmërinë e publikut. “Ndryshe nga sa paraqitet në këtë “sqarim”, unë jo vetëm nuk kam deklaruar, por as edhe nuk kam lënë të kuptohet se KED bllokohet nëse i nënshtrohem ndjekjes penale. Përkundrazi, në përgjigje të pyetjes së gazetares jam shprehur qartë, në gjuhën shqipe, se nëse ndiqem penalisht nuk mund të ushtroj më funksionin (në KED). I ndërprerë nga pyetja tjetër e gazetares, jam përgjigjur se KED, pra edhe ai i vitit 2020, do të vlerësojë situatën, duke u shprehur qartë se ka zgjidhje edhe për këtë lloj situate. Pa u menduar gjatë, kushdo e kupton se nuk bëhet fjalë për bllokim të KED. Kjo nuk mund të ndodhë”, thekson Dvorani në reagimin e tij.

Ai thekson se “në ditët që jetojmë, për të qenë të përgjegjshëm dhe të sinqertë, teknologjia na ndihmon për gjithçka, edhe për të verifikuar veten dhe që të mos nxitohemi për të folur pa u menduar. Opinioni dhe kushdo i interesuar, për të vërtetën, nuk ka përse të më besojë as mua dhe as “sqaruesin”. Mjafton të shikojë dhe dëgjojë atë që çdo media ka përcjellë ditën e djeshme, të cilën për lehtësi e kam bashkëlidhur këtij komunikimi (në fund të këtij materiali mund të gjeni videon me deklaratën përkatëse)”. Pikërisht ai e shoqëron reagimin e tij me videon e deklaratë së dhënë pas daljes nga prokuroria e Tiranës, ku u pyet tre orë për kallëzimin e bërë nga presidenti Meta. Dvorani gjithashtu reagoi edhe në lidhje me mos transparencën e KED-së, duke e cilësuar si të pavërtetë akuzat.

E-Mail
Rendi i ditës i publikuar nga kreu i KED. Gazeta Si, 12 dhjetor 2019


“Së dyti, “sqaruesi” evidenton “papërgjegjshmërinë” time përkundrejt transparencës duke njoftuar publikisht një rend dite të mbledhjes së KED, të ndryshëm nga ai dërguar anëtarëve dhe pjesëmarrësve në mbledhjet e tij. Edhe për këtë “papërgjegjshmëri” të evidentuar nga “sqaruesi” nuk do të përpiqem të shpjegohem gjatë. Në të vërtetë, në të dy rastet kanë qenë 5 çështje në rendin e ditës, ndryshon vetëm numërtimi. Sigurisht kalimet e procesverbaleve, si në veprimtarinë e çdo institucioni tjetër publik kolegjial nuk klasifikohen e vendosen si çështje të rendit të ditës. Përsëri, edhe në këtë rast, teknologjia na ndihmon për të verifikuar të vërtetën. Prandaj dy aktet e “papërgjegjshmërisë” time po ia bashkëlidh këtij komunikimi për t’i vlerësuar kushdo që mund të jetë i interesuar. Vetëm se i sjell në vëmendje “sqaruesit”, që çështjet e rendit të ditës së një mbledhjeje nuk janë kokrra mollësh që vetëm numërohen, por janë çështje që kuptohen dhe dallohen në përmbajtjen e tyre”, thekson Dvorani.

Kreu i KED, Dvorani duke dalë nga prokuroria. Gazeta Si, 12 dhjetor 2019

Më herët zëdhënësi i presidentit Tedi Blushi kishte mbajtur një qëndrim publik, duke theksuar se dhe nëse ndiqet penalisht Dvorani, nuk pengohet funksionimi i KED-së. jo është një alibi e neveritshme për t’i shpëtuar drejtësisë për veprat penale që Ardian Dvorani ka konsumuar dhe për të cilat është kallëzuar penalisht në Prokurori. Ligji për funksionimin e Këshillit të Emërimeve në Drejtësi e ka zgjidhur shumë mirë këtë situatë në nenin 227 të tij, ku parashikon se “Anëtari më i vjetër në moshë nga Gjykata Kushtetuese është Zëvendëskryetari i KED-së. Zëvendëskryetari ushtron të gjitha funksionet e Kryetarit në mungesë ose pamundësi të këtij të fundit”. Nuk është përgjegjësia penale e Ardian Dvoranit, që mund të bllokojë funksionimin normal të KED, por u bllokua qëllimisht funksionimi i KED për dy vite radhazi, që në krye të këtij organi të vihej Ardian Dvorani, për të konsumuar të tilla shkelje të rënda kushtetuese dhe ligjore”, theksoi Blushi.
Gjithashtu ai do të reagonte edhe për rendin e ditës së mbledhje së sotme duke theksuar se ishte njoftuar me rend dite të ndryshëm.

Të dashur miq,Me kërkesën tuaj po e publikoj dhe në anglisht spotin e parë në mbrojtje të Kushtetutës dhe integritetit të Gjykatës Kushtetuese.Mbrojtja e Integritetit të Gjykatës Kushtetuese, DETYRË MBI DETYRAT!

Gepostet von Ilir Meta am Donnerstag, 12. Dezember 2019

Presidenti Meta ndërkohë më herët publikoi në gjuhën angleze të videos që pretendohet me shkeljet e kreut të KED-së sa i përket procedurave të ndjekura për caktimin dhe emërimin e një anëtari të Gjykatës Kushtetuese.
“Me kërkesën tuaj po e publikoj dhe në anglisht spotin e parë në mbrojtje të Kushtetutës dhe integritetit të Gjykatës Kushtetuese. Mbrojtja e Integritetit të Gjykatës Kushtetuese, DETYRË MBI DETYRAT!”, shkruan Meta në Facebook.

Ndërsa zëdhënësi i tij, Blushi do të replikonte ndaj qëndrimit më të fundit të kreut të KED-së.  “Dvoran, ruaj qetësinë dhe mblidh mendjen! Të lutem mos dëmto provat se do rëndosh më shumë pozitën tënde! Më thonë gazetarët se paske publikuar dhe një video? Shumë mirë! Ruaj qetësinë me videot, se publikimi i tyre nuk ka filluar akoma! Ne e dimë që ty të kanë ngatërruar në anglisht, por do të sqarojmë edhe në shqip! Ndaj bën mirë t’i publikosh vetë i pari të gjitha provat dhe videot! Megjithatë, ne me shumë qetësi po presim hetimin! Reforma në Drejtësi do ecë përpara dhe askush nuk mund ta ndalë dot!”, replikoi Blushi.


Copyright © Gazeta “Si”



Më Shumë