.png)
Solidaritet absolut edhe nga bota e futbollit me të gjithë të prekurit nga tërmeti i fortë që goditi vendin tonë mëngjesin e sotëm, veçanërisht me familjet e viktimave. Kanë reaguar në rrjetet sociale thuajse të gjithë futbollistët dhe ish-futbollistët e Kombëtares, ka reaguar edhe presidenti i FSHF-së, Armand Duka.
Ish-kapitenët e Kombëtares, Lorik Cana dhe Mërgim Mavraj, ishin ndër të parët që bënë postime solidariteti në rrjetet sociale, ku shprehen se u gjenden pranë familjeve të viktimave të tërmetit. Më pas kanë bërë të njëjtën gjë edhe disa lojtarë të Kombëtares dhe presidenti Armand Duka. Klubi i Partizanit ishte i pari që reagoi në faqen zyrtare në lidhje me tërmetin, pastaj edhe Shkëndija e Tetovës.
Përveç futbollistëve dhe drejtuesve të futbollit në vend, kanë reaguar edhe disa nga grupimet më të mëdha të tifozëve shqiptarë, duke nisur me “Tifozat Kuq e Zi”, “Plisat”, “Guerrilsat” etj. Madje këto grupime nuk janë mjaftuar me mesazhe solidariteti, por kanë kaluar në veprime konkrete, duke mbledhur fonde për t’u ardhur në ndihmë familjeve të viktimave nga tërmeti. “Tifozat Kuq e Zi janë mobilizuar dhe kanë ngritur një fond emergjent për ndihmë në vatrat e prekura nga tërmeti. Ju njoftojmë se kemi filluar grumbullimin e mjeteve për zonat e dëmtuara”, shkruan grupimi “TKZ” në faqen e vet.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
