.png)
Mançester Junajtid nuk ka mundur t’i bëjë ballë “uraganit” Liverpul, që tashmë ka vënë njërën dorë te titulli kampion. Janë 21 fitore dhe 1 barazim, një ecuri e jashtëzakonshme për të kuqtë, të cilët e kanë mundur 2-0 Mançesterin, ndoshta më lehtë nga sa mund të ishte menduar para ndeshjes. Liverpulit iu anuluan edhe dy gola në pjesën e parë, i pari për faull ndaj portierit De Gea dhe i dyti për pozicion jashtë loje.
Virxhil Van Dijk në fillim dhe Mohamed Salah në shtesë realizuan golat e fitores për skuadrën e trajnerit Jurgen Klop, që tashmë është shkëputur 16 pikë nga Mançester Siti i vendit të dytë dhe për më tepër ka edhe një ndeshje më pak. Pas 22 ndeshjesh, skuadra nga “Anfield” ka 64 pikë. Një diferencë e madhe që mund të menaxhohet pa probleme nga Liverpuli në pjesën e mbetur të kampionatit. Titulli i munguar është shumë pranë dhe në Liverpul kanë nisur të mendojnë që tani për festën e madhe.
Nga ana tjetër, Mançester Junajtid pëson humbjen e dytë në tri ndeshjet e fundit dhe aktualisht mban vendin e 5-të, me 34 pikë. “Djajtë” kanë vënë në dyshim serioz pjesëmarrjen në Champions, ndërsa diferenca me Liverpulin ishte mjaft e dukshme.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
