Opozita në Kuvend do ta dërgojë në Kushtetuese propozimin e PS për hapjen e listave

Opozita parlamentare e vlerësoi antikushtetuese nismën formulën e mazhorancës për hapjen e listave të kandidatëve për deputetë dhe paralajmëroi se nëse kjo nismë votohet në Parlament në këtë formë, do ta padisë në Gjykatën Kushtetuese.

“Unë do ta çoj në Gjykatën Kushtetuese këtë draft. Nuk të lejon Kushtetuta që të mbyllësh listat më shumë se dy të tretat. Ti nuk do t’i hapësh listat 100 për qind, por mos më pengo mua që të bëj se çfarë më jep Kushtetuta të drejtë! Unë i pari do ta ankimoj në Gjykatën Kushtetuese brenda tetorit këtë draft”, paralajmëroi deputetit, Myslim Murrizi gjatë mbledhjes së Komisionit të Ligjeve.

Komisioni i Ligjeve u mblodh këtë të hënë për të diskutuar dy propozimet e depozituara në Kuvend për hapjen e listave dhe koalicionet parazgjedhore. Njëri draft është i socialistëve, ndërsa drafti tjetër mban firmën e 11 deputetëve të opozitës parlamentare, ndërkohë që PD bëri publik të dielën propozimin e saj, që pritet të dorëzohet në Këshillin Politik, sipas të cilit propozohet hapje e listave 100 për qind, renditje alfabetike e kandidatëve dhe mosndryshim të formulës së koalicioneve.

Në fund të mbledhjes, Komisioni votoi për të kaluar në parim ndryshimet në Kodin Zgjedhor, ku vetëm deputeti Andi Përmeti votoi kundër. Vota në parim nuk u hodh mbi asnjë draft, apo amendament, por iu la në dorë grupit të punës të ngritur nga Kuvendi për të bashkuar dy draftet dhe tre amendamentet në një tekst të integruar.

Propozimi ishte i ish-kreut të Komisionit të Ligjeve, Fatmir Xhafaj.

“Shoh një larmi propozimesh nga më të ndryshmesh në kohë dhe në adresimin e tyre. Ne kemi ngritur një grup prej 3 deputetësh, të bëjmë gjënë më të thjeshtë, mbase na i sjellin me një tekst të integruar dhe mbi atë tekst të integruar të diskutojmë edhe në parim dhe nen për nen”, tha Xhafaj.

Por, Rudina Hajdari e sheh të pamundur integrimin në një tekst të propozimeve të PS-së me propozimet e opozitës parlamentare. Shkak janë ndasitë e thella përsa i takon hapjes së listave.

“Janë disa propozime të ndryshme në kohë të ndryshme, por që emëruesi i përbashkët janë listat e hapura. Ka një konflikt të madh mes dy propozimeve. Opozita kërkon hapjen e listave 100 për qind me votën parapëlqeyese. Propozimi i PS bie në konflikt me këtë ide. Duhet një propozim i integruar, por duhet të merret në konsideratë se çfarë propozoni për listat e hapura. Në thelb propozimi juaj nuk hap listat dhe bie ndesh me Kushtetutën. Është i pamundur një tekst i përbashkët kur ka një konflikt thelbësor”, tha Hajdari.

Mes propozimeve të opozitës parlamentare ishte edhe pragu 1 për qind, ndërsa është rikthyer, edhe kërkesa për depolitizimin e grupeve të numërimit të votave.

Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.