Politike

Rama: Nuk kam përgjegjësi për moshapjen e negociatave. Azilantët, bishta

Kryeministri Edi Rama doli në një konferencë për shtyp me në krah Gent Cakajn pas marrjes së lajmit nga Brukselit se BE nuk do të diskutojë çështjen e hapjes së negociatave me Shqipërinë, duke e shtyrë këtë çështje për një herë tjetër.

Konferenca ishte thirrur për çështjen e negociatave, por Kryeministri Edi Rama e nisi fjalën me rastin e vogëlushit Alvin, që sipas emisionit investigativ italiane “Le Iene” është lënë në një kamp të ISISI në Siri edhe për neglizhencën e ambasadës shqiptare në Turqi.

Rama hodhi poshtë këto akuza. Ai tha se kampi për tërheqjen e 10-vjeçarit shqiptar nga kampi në fjalë nuk mjaftonte vetëm ndërhyrja e ambasadës shqiptare në Turqi.

“Kam komunikuar dhe me babin e djalit dhe e kam sqaruar se është një çështje që s’varet nga ne. S’është pjesë e strukturave tona diplomatike se s’bëhet fjalë për kampe refugjatësh të zakonshëm. Gazetarët mund të hyjnë në këto kampe dhe kanë shkuar e kanë filmuar edhe brenda trupave të ISIS, por s’është e njëjta gjë për të realizuar një operacion tërheqje të personave që duhen nxjerrë nga kjo situatë. Duke shprehur gjithë keqardhjen, dëshiroj ta ndaj me të tërë se e vërteta është kjo. Situata është më e ndërlikuar së fundmi se në atë territor ka një përplasje luftarake. Ne do vazhdojmë punën dhe jemi në koordinim me partnerët”, shtoi.

Pas këtij sqarimi, Rama iu kthye negociatave, temë për të cilën kishte thirrur këtë dalje para gazetarëve. Kryeministri këmbënguli se Shqipëria jo vetëm që kishte plotësuar kushtet e vendosura nga BE, por kishte bërë edhe më shumë. Duke komentuar një deklaratë të Kryeministrit holandez, Mark Rutte, Kryeministri shqiptare e cilësoi si “bishta për t’i kur zotimit për hapjen e negociatave”.

“Dëgjova kryeministrin e Holandës që thotë se nuk është bërë mjaftueshëm. Mjaftueshëm në raport me cfarë? Nëse e konsiderojmë progresin në lidhje me gatishmërinë për t’u bërë pjesë e BE-së është i pamjaftueshëm, por nëse krahasojmë me cfarë na është kërkuar dhe cfarë kemi bërë është shumë. Shtimi i bishtave nuk është korret.

Kryeministri këmbënguli se refuzimi i Macron nuk ka lidhje me ecurinë e Shqipërisë, por me përplasjet e brendshme të Bashkimit Europian.

“Franca nuk pranon të vazhdohet me të njëjtin process. Franca kërkon një reformim të brendshëm të BE-së dhe një transformim të vetë procesit të integrimit, deri në pikën që të arrihet në një tjetër objektiv për horizontin e integrimit. Një ndërveprim me Ballkanin Perëndimor që nuk mund të zhvillohet me të njëjtën metodë të procesit të deritanishëm të zgjerimit”, deklaroi ai.

Si provë për të bindur gazetarët dhe qytetarët se Shqipëria ka realizuar detyrat e shtëpisë, Kryeministri Edi Rama solli raportet e Komisionit Europian, që rekomandojnë hapjen pa kushte të negociatave me Shqipërinë dhe deklaratat e drejtuesve të tjerë të BE-së, që nga Komisioneri Johannes Hahn e deri tek Presidenti i Këshillit Europian, Donald Tusk. Rama cilësoi po “bishta” edhe argumentet e Macron për azilantët.

“Liderët e BE-së, që nga Presidenti i Këshillit, i Komisionit, Komisioneri për Zgjerimin, e thanq qartë që kjo që ndodhi është mosarritje konsensusi me vendet anëtare për arsyet e tyre. Është e tëpërt kur i shtohen bishta kësaj që është thelbësore: jo po azilantët, jo po kjo, jo ajo, këto janë bishta. Në këtë situatë, cilido nga vendet që janë sot në BE dhe të priste mbrëmë konsensus, nuk do kishte marrë dot. Tema është spostuar gjetkë. Kemi marrë një refuzim për tu marrë në konsideratë për çeljen e negociatave mbrëmë, por nuk kemi marrë asgjë më shumë se kaq, rruga jonë është e njëjta pa asnjë ndryshim, se i kemi bërë dhe do vazhdojmë t’i bëjmë reformat për vendin tonë”, deklaroi ai.

Kryeministri nuk e mohoi këtë fenomen, por tha se azilantët dhe emigrantët ekonomikë nuk janë vetëm problem shqiptar, por i gjithë Europës Qendrore dhe Jugore, duke përmendur një raport të gazetarit Tim Judah, sipas të cilit vendet e Ballkanit dhe të Europës Qendrore po përballen me një boshatisje demografike të madhe.

Rama shmangu çdo përgjegjësi për moshapjen e negociatave.

“Është përgjegjësia ime pse zhvillohen zgjedhje europiane kur duhet të merret një vendim dhe shtyhet?! Është përgjegjësia ime pse shumica e vendeve, duke filluar nga Gjermania thanë po dhe Franca tha jo?! Nëse në vendin e Gentit (Cakaj) do të ishte Nard Ndoka konsensusi do të ishte i garantuar, pa filluar diskutimi madje do ta kishin ftuar për darkë”, deklaroi Kryeministri.

 

Më Shumë