Lionel Mesi është fituesi i “Topit të Artë 2019”, në edicionin e 64-t të këtij çmimi që jepet nga francezja “France Football”. Për yllin argjentinas është trofeu i 6-të në karrierë, një më shumë se rivali i përjetshëm, Kristiano Ronaldo, i cili nuk ka qenë i pranishëm në Paris për ceremoninë e dhënies së çmimit prestigjioz. Mesi bëhet kështu futbollisti më fitues në histori. I fundit që e ka fituar “Topin e Artë” është kroati Luka Modriç, ndërsa i pari është Stenli Mathjus, mesfushori anglez i Blekpulit në vitin 1956. “Mundo Deportivo” e kishte paralajmëruar ditë më parë fituesin e “Topit të Artë”, duke ndjekur me shumë vëmendje zhvillimet e fundit dhe gjithçka ka rezultuar e vërtetë.
10 MË TË MIRËT – Lista e 10 lojtarëve më të mirë të sezonit të fundit, sipas “France Football” përbëhet nga këta emra: Alison (Liverpul), Levandovski (Bajern Mynih), Mahrez (Mançester Siti), Mane (Liverpul), Mbape (Psg), Mesi (Barcelona), Ronaldo (Juventus), Salah (Liverpul), Bernardo Silva (Mançester Siti), Van Dijk (Liverpul).
RREGULLORJA – Një gazetar nga çdo vend akordon 6 pikë, 4, 3, 2 apo 1 për 5 lojtarët që ai zgjedh si më të mirët, duke marrë në konsideratë atë çfarë ka fituar individualisht dhe me skuadrën, talentin dhe karrierën e kandidatëve. Kush merr më shumë pikë, shkon në listën finale. Në rast barazimi me pikë, fiton ai lojtar që është zgjedhur më shumë herë në vend të parë gjatë votimit.
“Topin e Artë” për të rinjtë e ka fituar mbrojtësi holandez i Juventusit, Mathijs De Ligt, pas një sezoni të shkëlqyer me Ajaksin dhe tani me kampionët e Italisë. Portieri më i mirë është shpallur braziliani i Liverpulit, Alison, kurse “Topin e Artë” për femra e ka fituar amerikania Megan Rapinoe, kampione bote me Amerikën.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.