.png)
Nga Gazeta ‘Si’-Zëdhënësi i Bashkimit Europian, Peter Stano ka komentuar vizitën e të dërguarit të Posaçëm të BE-së Miroslav Lajçak në Kosovë.
Stano është shprehur se vizita e Lajçak në Prishtinë vjen të kuadër të përpjekjeve për fillimin e procesit të dialogut mes Kosovës dhe Serbisë.
Gjithashtu zëdhënësi i BE-së ka zbuluar se Lajçak ka në plan të vizitojë Serbinë së shpejti, për të diskutuar për hapat e ardhshëm rreth dialogut.
Në vizitën e mbrëmshme, Lajçak është takuar me zëvendëskryeministrin e Kosovës, Besnik Bislimi dhe ka biseduar për nevojën për zbatim të plotë të marrëveshjes së normalizimit pa vonesa e parakushte.
“Jam takuar me zëvendëskryeministrin e parë Besnik Bislimi për të vazhduar bisedimet për takimin e fundit me liderët evropianë në Bruksel dhe nevojën për zbatimin e plotë të Marrëveshjes për Rrugën e Normalizimit pa vonesa dhe parakushte. Po ashtu jemi pajtuar për hapat e radhës”, ka shkruar Lajçaku në platformën “X” pas takimit.
Nga ana tjetër, autoritetet e Serbisë, thanë të hënën se Prishtina zyrtare ka refuzuar një ftesë për takim ndërmjet kryenegociatorëve që është dashur të mbahet këtë të martë në Bruksel. Qeveria e Kosovës nuk i komentoi këto pohime.
Vizita dyditore, e paralajmëruar e emisarit të BE-së për dialogun Kosovë-Serbi, Mirosllav Lajçak, në Kosovë, në agjendë parashikon edhe një takim të tij të përbashkët me krerët e opozitës ditën e sotme(7 nëntor).
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
