.png)
Nelson Hysa, boksieri që është akuzuar si pjesë e grupit kriminal “Bajri” të vënë në pranga pak muaj më parë, u vu në pranga dje nga policia e Tiranës.
Nelson Hysa është shumë i njohur në qytetin e Shkodrës, si sportist i dalluar ndër vite. Boksieri 35-vjeçar lindur dhe banues në Shkodër, ishte person i shpallur në kërkim në shtator 2018, gjatë operacionit “OAZ”, si i dyshuar për kryerjen e veprave penale “Organizata kriminale, “Kryerja e veprave penale nga organizata kriminale” dhe “Grupi i strukturuar kriminal”, “Paracaktimi i rezultateve në garat sportive, e kryer në bashkëpunim”, për qëllime të fitimit pasuror.
Nelson Hysa edhe më herët ka qenë i njohur për policinë e qytetit verior si i përfshirë në disa ngjarje kriminale, disa muaj më parë atij i ishte bërë atentat në një nga lagjet kryesore të Shkodrës nga dy persona që më pas u vunë në pranga. Boksieri Hysa është i akuzuar si një pjesëtarët e grupi “Bajri”, ku dyshohet që të ketë lidhje të forta shoqërore dhe miqësore me një nga krerët e këtij grupi, Safet Bajri. Pas arrestimit në kryeqytet, pritet që boksieri shkodran të dalë para gjykatës, ku do të mësojë masën e sigurisë.
Këtij të fundit madje i është bërë edhe një atentat në 7 maj të vitit 2017, gjatë të cilit mbeti i plagosur. Hysa sapo kishte dalë nga një berberhane kur është qëlluar me armë zjarri disa herë nga dy persona të maskuar që udhëtonin me motor.
Pas krimit, policia identifikoi dhe arrestoi autorët e dyshuar Valter Ksolla 21 vjeç dhe Kolë Progni, 25 vjeç.
35-vjeçari i shpëtoi policisë 6 muaj më parë kur u arrestua Safet Bajri dhe pjesa tjetër e grupit. Koka e grupit kriminal të Bajrajve konsiderohet Enver Bajri 45 vjeç, i arrestuar në Spanjë dhe që pritet të ekstradohet në Shqipëri për t’u përballur me akuzat.
Pse ndodhi plagosja në 2017
Referuar burimeve, shkak për këtë plagosje ishte një konflikt për xhirimin e gomave të makinës. Në nëntor të 2018- s, Gjykata e Shkodrës dënoi me 6 vite burg autorin e plagosjes së Nelson Hysës.
Ndërsa nga dëshmitë rezultoi se në datën 3 maj 2017, gjatë orëve të para të paradites, rreth orës 10:00, i dëmtuari Nelson Hysa së bashku me shokun e tij A.D. kanë pasur një konflikt verbal me shtetasin Valter Ksolla.
Ky i fundit drejtonte një autoveturë të markës “Audi A6” dhe ka bërë xhirime të gomave në afërsi të tyre. Rreth orës 12:30, Nelson Hysa së bashku me A. D. kanë qenë duke lëvizur me makinë në rrugën e gjerë, që të çon në lagjen Kiras dhe te një piceri, në anën e djathtë të rrugës, ata kanë parë makinën “Audi” që i kishte xhiruar afër tyre.
Nelsoni ka ndalë makinën dhe së bashku me shokun e tij kanë hyrë në piceri. Aty kanë gjetur shtetasit Valter Ksolla dhe Kolë Progni. Sapo Nelsoni dhe shoku i tij janë futur në piceri, shtetasit Valter Ksolla dhe Kolë Progni janë ngritur në këmbë nga frika se Nelsoni mund t’i godiste dhe i janë drejtuar Nelsonit me fjalët se, pse po vjen “si i fortë se ne kena hallet tona boll, se jena në gjak”.
Nelsoni u ka thënë se nuk kishte ardhur si i fortë, por për t’u sqaruar se pse i kishin bërë spektakël me makinë para këmbëve të tyre dhe para shtëpisë, duke vënë në rrezik ata dhe djalin e tij. Shtetasit Valter Ksolla dhe Kolë Progni janë nervozuar dhe i kanë thënë se do të shihemi më vonë, ndërsa Nelsoni i ka thënë se nuk kemi pse shihemi më vonë, por sqarohemi tani.
Shtetasit Valter e Kolë kanë ikur pa folur më, kanë hipur në makinë duke xhiruar përsëri gomat. Tri ditë më vonë, Progni e Ksolla kanë qëlluar me armë zjarri në drejtim të Hysës, kur ky i fundit po qëndronte përpara një berberhaneje, duke e plagosur rëndë atë.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
