Albin Kurti duket se ka ndërmarrë një përpjekje publike për ta rikthyer Lidhjen Demokratike të Kosovës në tryezën e negociatave.
Lëvizja Vetëvendosje i ka nisur një letër publike kreut të LDK-së Isa Mustafës, ku i kërkon që të vazhdojnë bisedimet për koalicionin qeveritar, pa përfshirë në këto negociata postin e kryetarit të Kuvendit.
Kurti shkruan se VV-ja u ka ofruar më shumë se gjysmën e qeverisë, duke ofruar një ndarje 6+5. Kreu i VV-së thekson po ashtu se ka rënë dakort me LDK-në për t’i ofruar edhe për kandidatin për postin e presidentit, edhe pse sipas Kurtit kjo çështje nuk është fare urgjente.
“Nuk mund të delegjitimojmë institucionet demokratike me ujdi monarkësh. Zgjedhja e Konjufcës ishte legale dhe legjitime”, ka shkruar ndër të tjerash Kurti, duke ia bërë të qartë Mustafës se nuk negocion më me këtë post.
Letra e Kurtit vjen ndërkohë që Kryetari i Kuvendit të Kosovës, Glauk Konjufca ka thirrur mbledhjen e parë të Kryesisë së Kuvendit të Kosovës më 20 janar, në orën 11:00.
Mustafa ka thënë se anëtarët e kësaj partie janë duke e shqyrtuar letrën e dërguar nga kryetari i Lëvizjes Vetëvendosje, të cilën e kanë konsideruar si dicka jozyrtare.
Ai ka thënë se LDK-ja është e interesuar që ta përfundojë negociatat më LDK-në dhe të formojë koalicionin qeverisës.
“Letrën do ta shohim, por nuk e konsideroj si letër zyrtare dhe përgjigje zyrtare. Ne do të mundohemi të punojmë në mënyrë maksimale për marrëveshjen. Dhe për këtë kërkoj që edhe Lëvizja Vetëvendosje të japë kontributin e saj”, tha Mustafa.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.