Gazeta Si – Tirana mund të quhet finalistja e parë e Kupës së Shqipërisë, edhe pse është për t’u luajtur edhe ndeshja e kthimit me Teutën. Me fitoren e sotme 3-0 kryeqytetasit e bëjnë thuajse formale sfidën e kthimit.
Florent Hasani në pjesën e parë dhe Bruno Lulaj e Regi Lushkja në të dytën firmosën golat e fitores bindëse të Tiranës. Skuadra e trajnerit Orges Shehi po shkon drejt suksesit të dyfishtë këtë sezon. Përveç titullit, ku është favorite ndaj Partizanit, ka shansin edhe për Kupën e Shqipërisë, ku finalja duket e sigurt.
Teuta në anën tjetër tregoi se jo më kot qëndron në katet e poshtme të renditjes në Superiore. Durrsakët e patën të vështirë të përballonin forcën e Tiranës.
Vazhdon të vuajë Vllaznia. Shkodranët i shpëtuan sot humbjes së dytë radhazi në ‘Loro Boriçi’ me një gol të shënuar në minutën e 6-të shtesë. Deri në atë kohë Egnatia po kryesonte 0-1, falë golit të Duamenës. Sulmuesi i momentit neë Superiore realizoi pas një kundërsulmi të shpejtë, ndërkohë që pjesën e parë kishte goditur traversën.
Ardit Hoxhaj, i futur në fushë nga stoli, shënoi golin e barazimit për Vllazninë. Kualifikimi mbetet plotësisht i hapur për ndeshjen e kthimit, por kjo Vllazni nuk jep shumë shpresë, ndërsa rrogozhinasit janë pranë një arritjeje historike, kalimit në finale të Kupës së Shqipërisë.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.