Gazeta Si – Luhen sot dy ndeshjet e kthimit gjysmëfinale të Kupës së Shqipërisë, Egnatia-Vllaznia (1-1) dhe Teuta-Tirana (0-3). Tirana është e favorizuar për të qenë në finale, pasi e ka fituar 3-0 ndeshjen e parë ndaj durrsakëve.
Vetëm pak ditë më parë Teuta dhe Tirana u ndeshën në kampionat në ‘Niko Dovona’, ku skuadra e Martinit fitoi 2-1, por sot ndryshon historia. Kryeqytetasve u mjafton të administrojnë fitoren e thellë të ndeshjes së parë, pa shpenzuar shumë energji, aq më tepër që përpara kanë derbin me Partizanin, vendimtar për titullin.
Teuta shpreson për përmbysjen e madhe, por 3 gola ndaj një kundërshtari si Tirana është e vështirë të shënohen.
Egnatia-Vllaznia është një ndeshje më e balancuar. Vllaznia, që ka mbi vete gjithë presionin, barazoi në fund të ndeshjes së parë, duke mbajtur gjallë shpresat e kualifikimit. Egnatia i ka mundur më pas shkodranët në kampionat dhe sot ka mundësi të mëdha për të shkruar historinë me kalimin në finale të Kupës.
Për Vllazninë është një ndeshje jetike, që vjen në një moment mjaft delikat, pas disa rezultatesh zhgënjyese. Nëse eliminohet nga Kupa, Vllaznia rrezikon shumë të mbetet edhe jashtë Europës.
Gjysmëfinalet, ndeshjet e kthimit
Sot, ora 15:00
Egnatia-Vllaznia
Ora 17:00
Teuta-Tirana
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.