.png)
Është normale që interesi për mbrojtësin kuqezi, Marash Kumbulla, të jetë në rritje. Paraqitja e tij e mirë me Veronën në Serinë A në një moshë shumë të re, ka bërë që drejtuesit e klubeve të mëdha në Itali të nisin që tani punën për të siguruar shërbimet e qendërmbrojtësit 19-vjeçar.
Shtypi italian shkruan se Kumbulla është që tani një objektiv i klubeve “big” të Serisë. I pari klub që ka dalë hapur për blerjen e mbrojtësit të Kombëtares së Shqipërisë, është Fiorentina. Kontaktet kanë nisur dhe me shumë mundësi shkodrani do të bllokohet që në janar nga drejtuesit e Fiorentinës, për të kaluar pastaj në verë te skuadra vjollcë. Do të ishte një hap i madh për futbollistin e ri shqiptar, nëse kalon në Firence, por ka edhe klube të tjerë që po punojnë pa zhurmë për një akord të mundshëm me Veronën. Lacio, si gjithmonë, është një tjetër klub i interesuar, pasi Igli Tare gjithmonë u ka krijuar mundësi shqiptarëve. Me kalimin e kohës pritet të mësohet më shumë për ofertat konkrete. Fiorentina ka zënë radhën e para.
Marash Kumbulla shënoi golin e parë në Serinë A në fitoren 2-0 ndaj Sampdorias. Trajneri i Veronës, Juriç, i ka besuar atij një fanellë titullari që në fillim të sezonit, pavarësisht moshës shumë të re. Dhe mbrojtësi e ka shfrytëzuar shansin, duke u sjellë në fushë si një lojtar me shumë përvojë. Paraqitja e tij bëri që trajneri i Kombëtares, Edi Reja, ta grumbullonte dhe t’i jepte mundësinë e debutimit me fanellën kuqezi në Moldavi. Kalimi në një klub më të madh se Verona do ta bënte Kumbullën një lojtar edhe më të rëndësishëm për Kombëtaren.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
